張建聲與陳小春在劇中有大量對手戲。
近期熱播的網劇《反黑》內地點擊率直迫三億，香港的劇迷亦都會晚晚凌晨12點就上YouTube追看，不過期間就發生了一段小插曲，在10月1日凌晨3時YouTube上的《反黑》頻道因遭惡意檢舉而突然被封鎖，幸好到當日早上已解除封鎖，劇迷可以繼續捧場，大家不用擔心。
《反黑》點擊億億聲，當然要食住個勢，據可靠消息透露，該劇已落實開拍第二季，劇組已做緊前期工作，正在撰寫劇本，部分角色更已經設計好曬造型，骨幹人物原班人馬上陣之外，亦會加入一些新角色和新的演員陣容，今季投資了6000萬元去製作，而第二季亦會加碼一倍，以１億２千萬製作。
劇組對於可以開拍第二季感到非常開心和鼓舞。
記者就電話訪問了張建聲，向他求證《反黑》是否會開拍第二季，他即呼籲大家要繼續多多支持該劇：「係有意出第二季嘅，如果愈多人睇嘅話，咁開拍第二季嘅機會就愈高，因為我哋都係要睇返究竟嗰個view數收到幾多，嚟決定呢件事，所以觀眾嘅點擊率同支持好重要。希望多啲觀眾繼續分享出去，令到我哋嘅點擊率再高啲嘅話，咁我哋就可以更加有勝算係可以叫投資方再加大少少個budget畀我哋，咁我哋就可以做到第二季更加好嘅效果，投資製作嘅budget大啲，我嘅演技又可以再發揮好啲。」
飾演招積的張建聲叫大家記得繼續追看並開心share，總之多多支持。
至於觀眾好關心的「誰是Final Boss」，他就好口密不肯透露半句，總之叫大家記得追看下去啦！