2020-08-09 14:17 來源：澎湃新聞·澎湃號·湃客
原創 徐 璉 海上夢疊
來源:上海老年報
作者:徐 璉
滬語改寫:馮濟民
講述:劉時醫
文字修正:丁迪蒙
農曆六月初六，是江南地區個傳統節日，俗稱「曬黴節」。廟裡向曬經、文化人曬書，民間百姓曬衣裳咾啥，搿也是樁大事體呀。
現在個大城市，高樓林立，拿書搭仔衣裳咾啥搬到陽光下頭去曝曬個情景已經看勿到了。
勒我老家鄉下頭，「六月六曬黴」個風俗仍舊存在個。經過長達一個多號頭個嗒嗒渧個梅雨季節，勿要講衣裳，就是人個情緒也像煞是受潮、發黴了。好勿容易盼到了「出梅」，天氣開始由陰轉晴，日頭旺了，辣豁豁個，空氣也清清爽爽個，種田個左鄰右舍，儕開始忙起來了。
大家儕去端出兩條笐（hang行）凳，搿是種比普通個板凳狹一眼、又要高一眼個長條凳子，上頭擱兩根毛竹杆，再鋪開蘆葦杆編個簾子，搿個過程，鄉下頭稱伊為「打笐」。笐打好之後，女主人到屋裡向去翻箱倒櫃，拿一家老小個衣裳儕搬到笐浪向，一件件攤開來曬，搿個辰光五顏六色，邪氣好看呀。民間有諺言「六月六，家家曬紅綠」。「梅、黴」諧音，因此，六月六曝曬衣物，既有去黴、滅菌、殺蟲個功效，又有得驅晦氣、迎吉祥個寓意。
「六月六曬黴節」，老百姓曬曬紅綠，文化人曬個就是書了。我個家鄉縣誌裡就有「六月六曬書」個記載。因此，「曬黴節」又撥稱作「曬書節」。縣城裡向文化人多，囥勒海個書也多，愛好古玩個還囥眼古籍搭仔字畫。碰著大太陽，讀書人家也會得去曬曬書、曬曬字畫。
文化人曬書勿像農民曬衣物搿能個顯山露水，書往往是曬勒自家院子裡通風、乾燥個地方。小辰光，我見過隔壁蔡家公公曬書。我邪氣好奇，透過伊屋裡院門個門縫去偷看。年近古稀個蔡家公公篤悠悠個坐勒廊下頭，一邊吃吃茶，一邊捧牢本書勒看，還會得時勿時立起身來，去掀動勒勒暴曬個書頁。
1979年我考取大學，讀文科，幾十年下來，也積累了勿少書。歷史、文學以及訂閱了老多辰光、一直勿捨得摜脫個一些刊物。市區裡房間小，有一部分就陸陸續續搬到鄉下個老房間去離開。現在，竟然也有「六月六曬書」個體驗了。
勒陽光充足個農家小院，我搬出摺疊個小木床，打來，拿書櫥裡個書搭刊物一眼眼平鋪勒上頭。再搬把竹躺椅來，擺勒葡萄架下頭，坐好，閉牢仔眼晴傾聽書頁搭陽光個竊竊私語；有辰光，也像蔡家公公一樣，從曬勒陽光個書籍裡向抽一本出來，捧勒手裡，輕輕叫讀，我勒感受擁有無價財富個歡喜搭仔滿足呀。
作者：徐璉
講述者：劉時醫
原標題：《農曆六月初六》
閱讀原文
關鍵詞 >> 湃客
特別聲明
本文為澎湃號作者或機構在澎湃新聞上傳並發布，僅代表該作者或機構觀點，不代表澎湃新聞的觀點或立場，澎湃新聞僅提供信息發布平臺。申請澎湃號請用電腦訪問http://renzheng.thepaper.cn。
相關推薦
評論（）