無綫花旦王君馨（Grace）早前於臺慶劇《是咁的，法官閣下》內糾結於與黃智賢的一段婚姻，千辛萬苦都要查出自己被拋棄的原因，然而現實生活中她卻是個沉溺於幸福的小女人，她坦言與丈夫交往12年以來經常分隔兩地，靠意志堅持對另一半忠貞，更自爆曾對拍劇對手心動過。
王君馨的丈夫於美國土生土長，他卻「不愛江山愛美人」，年前捨棄家鄉的一切來港與她組織家庭。交往12年以來，曾經分開，但最終複合兼且步入教堂，談起這段情，Grace自覺得來不易：「我拍拖嘅次數唔多，老公係我第三個男友，不過，即使大家喺美國嘅時候，都可以話係『異地戀』，佢要揸三個鍾車先可以見我一面，但都好過我返咗香港後，要搭十幾個鍾飛機先見到。坦白講，結婚前我哋見得最耐嗰次，只係三星期，每次分開送機都喊到收唔到聲。我哋交往冇錫錫、交換禮物嘅類似溫馨嘢，所以婚後真係要花時間去適應。」
或許正因為長時間「神交」，令這段關係仍保持新鮮，Grace不禁透露「閨房樂」：「大家忙完返到屋企，都會攬夠先！」自言「五歲已想嫁個好老公」的Grace，形容初次與Daniel邂逅時，對方「又黑又瘦眼又細」，不過情人眼裡出西施：「佢走咗入我打工嘅餐廳飲嘢，咁啱佢又識我同事，佢見到我竟然面紅，好可愛呀！佢仲會妒忌我身邊嘅異性。」
這段緣分在女方返港發展後，曾寫下短暫的句號，不過正如Grace所講，信主後令二人突然恢復聯絡，彼此信任更勝從前：「我成日都話，女仔要守住自己個心，而男仔就要守住自己眼睛，尤其係我哋以往經常分隔兩地，對對方忠貞就好靠意志。坦白講，我拍劇曾經對對手心動過，當我發現唔得嘞，就打電話畀Daniel，向佢一五一十咁講清楚，然後我答應佢唔再同對方單獨見面，會喺對方面前多啲提佢，同埋佢返嚟嘅話我會介紹大家認識，Daniel聽完我咁講就話OK，好信任我。」
洋妞性格的Grace不諱言知道自己的性格曾惹來負評：「好似佢哋話我做乜高八度聲音去講嘢，好彩我嘅宗教、老公、家人及密友都係我精神嘅支柱，係佢哋話畀我知，唔需要太介意別人眼中嘅自己。韋史密夫（Will Smith）有句名句我成日用嚟提醒自己，大意係話如果自信心來自別人口中嘅話，等同要喺破鏡中見到完美嘅自己，即係話所有嘢都扭曲曬，所以做人最緊要係做自己，享受箇中嘅快樂。」
對於自己的演藝事業，Grace未有日後退隱的打算：「我平日嘅生活好簡單，不過拍戲就可以畀機會我過嚇『不一樣的人生』。依家我會去做一啲鍾意做嘅嘢，搵到錢可以投資，做啲鍾意嘅音樂。」
Grace喜歡用衣著表達心情，尤其是去過「米蘭時裝周」後，更明白服飾與髮型配搭會增加個人自信。談到她於《是》劇出場時的「出水芙蓉戲」，她笑說：「嗰時公司啱啱發咗女藝人性感度指引，我臨時臨急喺唔同嘅網站訂咗十幾套泳衣返嚟揀，冇得試身覺得訂多好過訂少，結果搞到一屋都係泳裝，好彩出嚟嘅效果唔錯。其實為咗呢場戲，我操咗兩個月肌肉，針對收減背部脂肪。」對於打扮及工作，她的認真度實在驚人﹗