編者語：「邪邪氣氣」辣上海郊區有些地方，可以做謂語，也可以獨詞出現。如：「排隊個人，邪氣邪氣！」；「排隊個人多勿多？」「哦！邪邪氣氣！」，勿一定要講「邪邪氣氣多！」搿個是省脫了「多」或「多得來」個結果。
上海話裡個「交關」「搭仔」「邪氣」可以做副詞充當狀語，意思是「很」、「十分」、「非常」。譬如講「很多」、「非常多」、「十分多」，就可以將「交關多」，也可以講「邪氣多」。「排隊個人交關多」，也可以講「排隊個人邪氣多」。
但是，「交關」和「邪氣」個用法是有區別個。用「AABB」重疊式，「交關」可以重疊成「交交關關」，做形容詞。它可以充當補語、謂語、獨詞句。譬如講，「排隊個人多得來交交關關」（做補語），「排隊個人交交關關」（做謂語），回答人家「排隊個人多勿多」個辰光，可以用獨詞句回答：「交交關關。」而「邪氣」重疊成「邪邪氣氣」個辰光就只能充當補語。可以講「排隊個人多得來邪邪氣氣」（作補語），卻勿能夠充當謂語搭仔獨詞句。譬如勿能講「排隊個人邪邪氣氣」。別人問「排隊個人多勿多」個辰光，就勿能夠用獨詞句回答「邪邪氣氣」。
另外，「交關」勿重疊也可以做形容詞，充當定語。譬如講，「有交關人辣海排隊」（「交關」做形容詞做「人」個定語），卻勿能夠講「有邪氣人辣海排隊」；可以講「有交關魚辣海遊來遊去」，卻勿能夠講「邪氣魚辣辣河浜遊來遊去」。為啥呢？原因就是「交關」勿重疊也可以做形容詞修飾名詞（像「人」、「魚」等等）充當定語，而「邪氣」勿重疊只可以做副詞充當狀語，勿能夠做形容詞修飾名詞充當定語。所以，正確運用「交關」、「邪氣」，是有講究個。 (來源：新民晚報)