TVB《萬千星輝頒獎典禮2021》日前公佈視帝、視後、最佳男配角、最佳女配角等五強名單，唔少大熱人馬如《星空下的仁醫》鍾嘉欣、鄭嘉穎；《智能愛人》Ali李佳芯等都有入圍，但都有好多人不滿有藝人未能晉身五強。
陳展鵬、鄭嘉穎、馬國明再爭做視帝
「最佳男主角」入圍五強有《逆天奇案》陳展鵬、《換命真相》譚俊彥、《星空下的仁醫》鄭嘉穎同馬國明、《拳王》張振朗。其中陳展鵬、鄭嘉穎、馬國明都已經攞過一次，譚俊彥2016年正式籤約TVB後首次入圍視帝最後五強，今次有望首奪「最佳男主角」。
張振朗為拍《拳王》操fit身型，2020年《萬千星輝頒獎典禮》更奪「最受歡迎電視男角色」，更揮低同劇大前輩黎耀祥入圍視帝最後五強。
Ali李佳芯、鍾嘉欣成視後大熱
「最佳女主角」入圍五強分別係《智能愛人》李佳芯、《七公主》林夏薇、《把關者們》黃智雯、《星空下的仁醫》鍾嘉欣、《拳王》姚子羚。
鍾嘉欣憑《星空下的仁醫》「章以芯」超強喊戲成頂頭大熱，有人統計佢以往曾獲提名10次但都係「陪跑」，今屆有望「開齋」一嚐視後滋味！不過Ali同樣不可小覷，佢喺《智能愛人》飾演AI阿寶都好考演技，加上Ali有極佳觀眾緣，喺TVB公佈入圍名單嘅影片下有唔少網友力撐Ali再奪視後！
「最受歡迎電視男角色」金城安、「初哥哥」胡鴻鈞入圍
視帝最後五強中只有《換命真相》時光（譚俊彥）《星空下的仁醫》況叢昕（馬國明）同時入圍「最受歡迎電視男角色」，佢哋嘅對手有《愛‧回家之開心速遞》金城安（周嘉洛）、《智能愛人》古家廉（陸永）、《十月初五的月光》文初（胡鴻鈞）。
周嘉洛曾於2019年以24歲之齡成為歷年最年輕的「最佳男配角」，獲TVB力捧嘅佢今次有望再下一城首奪「最受歡迎電視男角色」。《十月初五的月光》「初哥哥」胡鴻鈞角色都好有競爭力，一直以嚟胡鴻鈞都係攞「最受歡迎電視歌曲」，如果攞獎將會係佢首次憑演技奪《萬千星輝頒獎典禮》獎項。
「最受歡迎電視女角色」姜麗文、滕麗名同視後候選人爭獎
視後最後五強嘅《愛美麗狂想曲》王麗美（李佳芯）、《逆天奇案》馬穎思（林夏薇）、《星空下的仁醫》章以芯（鍾嘉欣）同樣入圍「最受歡迎電視女角色」，雖然只有鍾嘉欣係以同一套劇集獲提名，但Ali同林夏薇都有望奪獎。
《愛‧回家之開心速遞》熊尚善（滕麗名）、Liza（姜麗文）同時入圍，姜麗文最令人驚喜，估唔到佢飾演嘅「姐姐」演技獲好評會入到「最受歡迎電視女角色」五強。
「最佳男配角」競爭超大
入圍五強嘅有：《逆天奇案》張頴康、《智能愛人》泰臣、《換命真相》朱敏瀚、《星空下的仁醫》羅子溢、《拳王》黃子恆。5位候選人都好有可能奪獎，但呼聲較高嘅有張頴康、羅子溢。
「最佳女配角」Yoyo陳自瑤、姜麗文係大熱？
《愛‧回家之開心速遞》姜麗文、《寶寶大過天》陳自瑤、《智能愛人》麥美恩、《換命真相》劉佩玥、《星空下的仁醫》何依婷入圍最後五強，姜麗文同時亦係「最受歡迎電視女角色」五強，有女配大熱之一，而Yoyo陳自瑤參加綜藝節目《好聲好戲》、《識貨》奪冠後人氣急升，加上同老公王浩信「破冰」互動亦成為熱話，亦有望攞獎。
不過近日喺《十月初五的月光》飾演「萬朱莎華」嘅姚嘉妮演出備受好評，即使原作陳曼娜已成經典仍不落下風，今次未能入圍「最佳女配角」五強，有唔少網友留言替佢不值。
王灝兒JW、陳瀅、羅天宇等人力爭「飛躍進步男女藝員」，「星夢幫」踩過界爭獎
「飛躍進步男藝員」有六強：林正峰、羅天宇、馬貫東、丁子朗、黃庭鋒、胡鴻鈞，競爭超大！胡鴻鈞、羅天宇、丁子朗都好有機會首度奪獎！
「飛躍進步女藝員」五強：陳瀅、姜麗文、王灝兒JW、王敏奕、遊嘉欣。「飛躍女藝員」同樣競爭好大！男藝員方面「星夢一哥」胡鴻鈞獲提名，女藝員中「星夢幫」仲有JW、王敏奕都入圍，但佢哋對手強勁，有人氣女神陳瀅，仲有喺《開心速遞》同《星空下的仁醫》演出都備受好評嘅姜麗文，遊嘉欣年輕但參與嘅節目、劇集都比JW、王敏奕多。