（請在文字結束的本頁底部點擊「閱讀全文」，進入荔枝平臺，收聽廣播內容。上海話頂呱呱談山海經微信公共群(LaoColorGossip)定期發布上海閒話廣播，歡迎關注)
廣播專輯 周立波海派清口4 打樁模子
（1）點擊下面收看視頻。（2）也可以點擊底部「閱讀全文」收聽廣播「
打樁模子就是搿個辰光出來個。上海個打樁模子絕對是有特色個。全上海所以個打樁模子噢基本浪向一個老師教出來個。大概要麼是同飲浦江水啊？！叫一方水土養一方人。哎伊拉嘸沒介整齊噢！！喏打樁模子娜回憶一下。原來剛剛出來個打樁模子，衣裳基本浪是統一個。只有兩種顏色。要麼是綠顏色個一套，要麼是藍顏色個一套，儕大咯咯，大咯咯。葛末，下頭呢著雙布鞋。對伐？葛末就講人麼手一直插辣袋袋裡，打樁模子。打樁模子眼神也統一個。伊隻眼神沒焦點個。就比方儂人辣前頭噢。伊勿正視儂個。眼神是閃個。伊比方講伊看儂，儂人辣搿搭，伊因為分分鐘鍾準備老派來捉伊儂曉得伐？！乃末打樁模子走路樣子也像一個老師教出來個。阿拉正常人對伐正常人是大腿帶動小腿。打樁模子勿是個，打樁模子是膝蓋帶動小腿，而且對伐伊搿膝蓋是讓小腿踢出去。娜聽得懂伐？哪能走路？我走撥娜看對伐？！娜看像伐？
（...周立波模仿打樁模子走路)哪能意思啦儂？哪能意思啦儂？朋友儂幫幫忙噢儂？儂幫我豁胖嘮？儂幫我豁帥嘮？儂幫我豁大嘮？豁米嘮？朋友幫幫忙噢儂？啊是打樁模子搿恁啊？乃末呢伊拉哪能打樁個呢娜曉得伐？哪能打樁像伊拉打香菸搿也叫打樁。打僑匯券也叫打樁。葛末搿個辰光打樁模子伊販外煙，通過走私渠道伊迭個香菸進來了。進來仔末打樁模子噢擺香菸也有套路個。蹩腳個香菸，就是打樁打外煙啦，蹩腳個香菸伊擺了下側路，搿搭叫內側袋，乃末良友嘮世平嘮擺辣下頭個，啥個箭牌萬寶路嘮擺辣內側袋裡向，有種香菸打光以後對伐，伊拉拿國產個金花當箭牌打，拿醒寶當萬寶路賣，立辣打樁。乃麼伊拉基本浪蹲辣活動區域辣啥個地方呢？比方講老大昌啊？新元昌啊？凱薩琳啊上咖搿種地方，因為為啥？因為裡向有交關元宵模子。
打樁模子幫元宵模子屬於講是一個種，但是分開個。打樁模子打樁，元宵模子釣馬個？搿個辰光談談生意個嘮啥。哎，上海搿幫元宵模子絕對有特色個。比方講伊一點半蹲辣老大昌進去，蹲點，到五點半就點一杯咖啡。而且搿杯咖啡噢儂一直看到伊辣辣吃，但是總歸吃勿光個。我想哪能樁事體？我就偷偷叫去看，一看，撥我看出來個。伊拉咖啡是搿恁吃個，就是講伊拉是吃半口吐一口，有兩個吐了勿好個吐得泡泡也吐出來了。葛嘮一下班日搿恁吞進吐出對伐，基本可以拿清咖吐成卡布基諾。
葛末打樁模子呢就進去打香菸了。葛末伊拉打香菸是搿恁打個噢。啪跑進去，打樁模子一般性是啪進去打好樁就跑出來個。裡向勿大蹲個。搿恁走個。朋友外煙要伐？外煙要伐？外煙要伐？外煙要伐？比方講儂叫：哎，朋友，幫我來包外煙？打樁模子腔調是搿恁個，因為為啥？因為伊勿曉得儂是拿蹩腳個還是拿好個。「朋友吃啥個牌子啦？」伊勿看儂個。「朋友，啥牌子啦？」「來包萬寶路」，「朋友大戶嘛？朋友內側煙「啪拿好。打樁模子伐嘸沒皮夾子個，歡喜一大疊十塊五塊頭一刀用橡皮筋扣好，找頭撥儂絕對大戶噢。下趟要香菸來尋我好伐朋友？！外煙要伐，外煙？
我搿個人比較有好奇心。我辣想為啥道理要叫伊拉叫打樁模子。葛末我就去問了一個資深個打樁模子。哎，我我我講我講阿阿哥啊，人家為啥要叫娜打樁模子呢？
「立波我講撥儂聽。」打樁模子講閒話吃字個。「立波我講撥儂聽。打樁模子基本浪進去打一圈就出來，阿拉蹲辣室外個叫打樁模子。」葛末蹲辣室外為啥叫打樁模子呢？「朋友，儂看呀，阿拉一套子彈褲著好。」伊拉叫搿個子彈褲。「阿拉子彈褲著好，阿拉手塞辣辣袋袋裡，外頭厭氣伐啦？人總歸抖抖個老要。搿個像房子打樁頭伐啦？搿個就叫打樁模子」。打樁模子個出典就是搿恁來個。我講撥娜聽，我有一次差點撥一個打樁模子吃生活。辣華僑商店門口，我碰著一個打樁模子，我差點撥伊吃生活噢。哪能樁事體曉得伐？華僑商店門口勿是儕是打樁模子嘛？葛末我正好路過，結果一個打樁模子對伐辣辣伊販外幣曉得伐？打外幣。
「朋友，日幣有伐？日幣。日幣啦，朋友，日幣有伐日幣。」
看到我，隨後我辣走過來。
伊講：「朋友日幣有伐？」
我講：日幣麼，儂要喊個呀。
「朋友，啥意思儂？」
我講:「搿個就叫海蜇皮呀。」
「朋友，儂白相我嘮！！！儂覅跑，我鬥儂人噢？」打樁模子奔個辰光手還插辣裡向。伊搿個叫腔調儂曉得伐？「朋友儂幫幫忙噢儂。」
娜慢慢叫回去娜辣路上自家試試看。絕對有難度個噢。打樁模子蠻有勁個。
（請在文字結束的本頁底部點擊「閱讀全文」，進入荔枝平臺，收聽廣播內容。上海話頂呱呱談山海經微信公共群(LaoColorGossip)定期發布上海閒話廣播，歡迎關注)