《愛美麗狂想曲》中飾演舞蹈教師Sean的鄧嘉傑，在劇集開始時與唐仁（蕭正楠飾）擦出火花，更令後者開始懷疑自己的性取向。今年28歲的鄧嘉傑曾參選香港先生，2017年參加藝員訓練班後加入TVB，在去年3月離巢。離開TVB後，他專心發展YouTuber事業，影片多以海底尋寶為題材，他在香港多處水域潛水為人尋找失物之餘，又順便執垃圾清潔海洋，十分有意義！
劇集是鄧嘉傑的離巢作之一。（《愛美麗狂想曲》截圖）
鄧嘉傑在2011年參選香港先生，晉身最後十強後未有加入TVB。2014年，他參加《香港傳藝節超級模特兒大賽》，獲得全場總冠軍。他亦拍過不少平面廣告，更考獲高級健身教練牌及高級潛水牌。
在2016年，鄧嘉傑參演電影《導火新聞線》，飾演《囧報》記者，至2017年參加第29期無綫藝員訓練班，之後加入TVB。2018年起開始拍劇，曾參演《愛回家之開心速遞》、《鐵探》等劇集。雖然鄧嘉傑拍過不少劇集，但多是寂寂無名的小角色，直至在去年《十八年後的終極告白》中飾演譚俊彥的年輕版，表現突出而令更多人認識他。
去年3月鄧嘉傑離開TVB，他表示離開的原因是因為工作時間與方向都唔太適合自己，「想創作自由度大啲，唔想受局限。」而之後投身YouTuber行業是因為興趣使然：「拍攝海底尋寶呢個題材係因為我好鍾意大自然，放假我都會對住個海或者去行山。初初拍尋寶片係因為疫情關係會多咗人行山或者露營，一定會多咗人唔見值錢嘅嘢，如果搵到我係會畀返主人。」
他指拍了一個月左右，由原來的尋寶變成「尋垃圾」，「結果同我初初嘅諗法完全唔一樣，百分之九十五都係垃圾嚟，搞到我好似拍執垃圾影片。之後希望大家可以關注環境同垃圾問題，後期慢慢演化到幫忙有尋回失物嘅元素。」
鄧嘉傑平日尋寶會用到兩種工具，分別是金屬探測器及不鏽鋼鏟。他坦言基本上於海底尋到的東西很多都是垃圾，如汽水蓋、鋁罐、包裝紙等。不過他亦曾在海底找到鑽石戒指、小刀、動物頭骨、電子產品等，而他找到的錢會放入海底基金，日後會捐助香港環保組織或海洋保護機構。
不過他就指幫網友搜尋失物難度相當高，可以話係大海撈針，「海入邊有唔同嘅因素會增加搜尋嘅難度，例如水流風向等等。暫時成功尋獲失物就得荒島嘅iPhone 。」
事緣是有網民曾聯絡鄧嘉傑求助，稱自己不慎在西貢枕頭洲水域遺失iPhone，鄧嘉傑翌日就出發到該地「尋寶」。在影片中可見他先根據網民提供的相片，到事發地點後潛下水底，再用金屬探測器沿海床尋找，期間他在水中發現魚網、鐵片、玻璃樽、筷子等垃圾，他也十分有心，順手把這些垃圾帶走。
經過一個多小時，鄧嘉傑成功尋回網民的iPhone，他相當興奮；而在他上岸後亦在岸邊幫手清理垃圾。鄧嘉傑表示自己做海底尋寶是無償的，「我想做一件單純嘅事就係幫人，呢樣嘢先係令我最開心。」
鄧嘉傑承認拍呢類型影片支出都好大，「因為每一次潛水嘅地方都比較偏遠，加上潛水裝備都係消耗品，車費雜費加加埋埋支出都唔少。堅持係因為想做一件自己鍾意嘅事之外，又幫到人同環境。所有網友嘅留言我都有睇，大家嘅支持都係我最大嘅動力！」
他又言拍海底獵奇有苦有樂，「我要揹住所有嘅潛水裝備同拍攝工具攀山涉水去、日曬雨淋拍攝，日後希望會組織到團隊拍攝減輕我體力上嘅負擔。不過整個過程我都係好享受，最開心就係見到物主失而復得後嘅喜悅，我都好替物主好開心！」
雖然現在主力做YouTuber拍片，但他亦指自己不會放棄幕前工作。「都繼續有做，有繼續拍唔同嘅廣告，都正在同其他媒體，公司傾緊唔同嘅合作。」