歌手吳浩康的感情生活可謂多姿多採，近年努力工作洗脫花弗形象，坐言起行戒掉壞習慣的他，在歌唱事業漸有起色之際，竟又被爆有新女登場！據知他與36G「咪神」崔碧珈秘撻4個月，雙方為保事業被迫低調拍拖。
近年修心養性的吳浩康（Deep），以實際行動洗底成功，「鹹魚翻生」舉行演唱會。事業有轉機的他，早前邀舊愛鍾舒漫到大帽山拍攝短片時深情對話，感動不少網民，被指有望翻撻，事後Deep更以「Never say never」不排除複合可能！正當大家以為二人能重修舊好，原來Deep與36G「咪神」崔碧珈（Anita）正低調拍拖！
一見鍾情雞啄唔斷
35歲的Deep與30歲的Anita看似大纜扯唔埋，一個唱歌一個拍戲，更從未合作，但據聞二人於年初朋友聚會中一撻即著，當晚已雞啄唔斷，之後又不時孖住出席私人聚會。雖然他們沒有太親密舉動，但被發現經常眉來眼去，
身邊人都認定他們情投意合。事業剛翻生的Deep，希望有朝一日踏上紅館開騷，而Anita約滿舊公司後衝出歐洲，去年獲外國Fashion TV邀請到康城做主持，二人要愛情又要麵包，故協議不公開戀情。 雖然愛得低調，但Anita卻忍不住在社交網洩蜜！今年初Deep到澳門開騷，她曾上載對方的演唱會海報幫手宣傳，並分享一段Deep唱歌直播的視像，留言贊男方是有熱誠、有heart的歌手。雖然一直自稱單身，但她曾上載於酒店睇電視的照片，見茶几上放有兩杯疑似酒的飲品，另一張則是她穿酒店浴衣躺在大床、拖實男士的手，春風得意笑得燦爛，似暗示蜜運中。而泰拳高手Deep亦有鐵漢柔情一面，經常化身廚男炮製美食餵飽女友。
「有事業先有將來」
對於被傳與Anita玩地下情，Deep未有否認拍拖：「現階段全部心機同時間都放喺事業，兒女私情遲啲先講啦！我唔細，一定要有事業先有將來，多謝大家關心。」而Anita則說：「多謝各位關心，我現時單身，工作上仲有好多學習同挑戰，只希望可以將工作做好，專注發展影視工作。」她坦言認識Deep，指除了支持對方的演唱會，亦有上載其他人的演唱會片段：「拖男人手？當日我為咗工作拍攝花絮相，嗰只手系工作人員，所以冇任何放閃，多謝大家關心。」