《同盟》去到結局篇，劇情亦愈來愈緊張，之前已經亮相Rainman原來是「金天」江美儀，但劇情又「點只咁簡單」，有指江美儀本身與保護令熊的「易先生」區瑞偉甚有淵源，對方是自己的師傅亦是胡定欣的師姐，佢除咗搞到令家雞犬不寧之外，仲令「令熊」鮑起靜身邊的親人妹妹、妹夫韓馬利、吳家樂以及林子善等，個個都各懷鬼胎，想推鮑起靜落無底深淵永不超生，而精叻嘅鮑起靜當然唔會坐以待斃，佢亦有設局反擊江美儀，點知反而令自己身陷險境。呢個時候，另一隻孤狸出現，佢竟然是「令熊」鮑起靜之子「高子傑」陳展鵬，佢竟然由忠變奸，仲同鮑起靜養子陳山聰決裂，劇情咁峰迴路轉，真系非常吸引！
預告再有人死
另一個「估你唔到」嘅位，就系有傳原來《同盟》的Rainman唔止一個人，Big boss另有其人，這人就是與江美儀甚有淵源的「易先生」區瑞偉！而且之後嘅劇情仲「死得人多」，據知，幾位主角陳展鵬、林子善、鮑起靜、區瑞偉、羅樂林，五個人之中，三個要死，譁，真系咪話唔心寒！
唔怕收視受影響
對於觀眾睇到咬牙切齒兼劇情率先爆，指陳山聰與陳展鵬兄弟決裂，陳山聰笑言：「依家仲有四集，我同展鵬兩兄弟，真系會有啲事發生，依家Rainman出現咗，又系咪真系得一個呢？咁就要拭目以待！」
至於怕唔怕劇透影響收視？陳山聰表示：「我相信嗰劇已經播咗廿幾集，已經有一定觀眾支持，如果劇透太多當然會有啲影響，但相信支持《同盟》嘅觀眾會繼續睇落去。」另一主角林子善當然也統一口徑封咀，至於監製文偉鴻則對於坊間多個劇透的說法，只回應：「咁容易估到就唔系我風格啦！少年太年輕！」