27歲藝人何佩瑜（Jeana）近期在臺灣拍攝電影，至前日剛剛煞科，昨晨她在臺灣卻不幸遇上交通意外，所乘坐的七人車車頭及車側炒至凹陷變形，當時坐於司機位旁的Jeana撞及頭、眼及鼻，同車10歲大的小演員盧宣彤（Debbie）亦撼親頭及下巴，兩人立即被送院，好彩經檢查及照X光後傷勢無大礙，均已出院休息。
Jeana昨一早乘坐劇組安排的七人車，從墾丁前往高雄，車程約兩個小時，原定抵高雄逗留一晚後，於今日返港。據知劇組安排了一位年輕女司機負責接載Jeana和小Debbie，但當車輛由墾丁駛去高雄的路段時突然失控，猛力撼向石壆，在車上瞓覺的Jeana嚇到花容失色，事後她和小Debbie感不適，齊被送院檢查。
驚魂未定嘅Jeana，回應時大呼Lucky：「我都系第一次遇上交通意外，好彩隔離系石壆，唔系鐵欄，如果唔系就會真系會碌落山，諗番好心寒！呢次我感受到車禍嘅震撼力，仲要撞到咁大力，不能想像架車反轉嘅話會系點，真系好危險！我自己都冇諗過，當時我瞓左，完全冇心理準備，不過最差嘅野系我撞到頭、眼同鼻，個鼻腫到成個阿凡達咁，眼又瘀曬！本身喺臺灣已經去左醫院檢查，不過有買保險，返到香港都會再去醫院Check嚇。」Jeana又表示男友翁子光亦非常擔心其傷勢。
Jeana苦笑前日拍潛水煞科戲時，已多次徘徊鬼門關，她說：「嗰日我要全程hold住呼吸，閉氣落到水底仲要做戲，自己每次想用盡啲秒數做戲，所以好遲先上水，試過控制時間錯左差啲窒息，所以每一次上水，望到海面一唞氣就好感動，好似來來回回鬼門關咁，估唔到煞科再有車禍。以前冇諗過生命可以咁脆弱，今次意外反而令我諗到，真系在乎一秒鐘之間嘅事，依家會更加珍惜身邊人。」
留臺兩個月，之前Jeana因為在墾丁學潛水傷及耳膜，而於當地睇醫生，豈料到留臺最後一夜，又要入院，不過Jeana就為飾演她女兒的小Debbie心痛，「因為我同佢都受左傷，佢撞親下巴，我撞親個頭，眼同鼻都腫左，但最慘系小妹妹，佢同我一樣拍呢套戲時，喺臺灣睇過兩次醫生，希望佢都快啲好番。」雖然小Debbie昨午已在facebook報平安，留言「逃過一劫」，但她upload了瞓病床及額角腫起的相片，都系令人睇見肉赤。
-End-