Stephy（鄧麗欣）同小方（方力申）拍拖10年間相當謹慎小心，絕少被媒體影到拍拖，更莫講話斷正二人出入香閨。不過，Stephy同王子發展姊弟戀後成個人唔同曬，對感情事睇得好開，唔單只喺7月中大方承認戀情，更被捕獲拍拖，仲見證住王子出入女方香閨添。
8月28日下晝大約6點半鐘，港媒目擊Stephy香車配美男，由大埔寓所直駛至海港城。戴住口罩嘅兩人一落車就各拎一個紅色環保袋，然後直入誠品，擺明有明確目標需要買，唔系單純拍拖。梗系啦，匿埋喺屋企卿卿我我、乾柴烈火，總好過走出街遮遮掩掩有所顧忌嘅。
為咗儘快完成任務返歸過二人世界，Stephy同王子前後腳趕路，甚少平排交談。但，一旦停低落嚟，二人就禁不住要調情一番。其實只系一個眼神再加啲細微動作，兩人就笑逐顏開，足見佢哋幾有默契、感情有幾熾熱，更突顯王子絕對冧得掂Stephy，話曬喺冧姐姐方面王子絕對有經驗。
2012至2014年間，王子同大自己5歲嘅楊丞琳拍拖。除咗曾經蜜遊夏威夷，又經常被臺媒影到男方進出楊丞琳閨房。雖然王子喺楊丞琳閨房中樂而忘返，但最後都因女方工作繁忙聚少離多分手收場。
唔想重蹈覆轍，王子同Stephy就算分隔異地，但不時會飛嚟香港貼身傍實女友，更將冧掂楊丞琳嘅招數套用喺Stephy身上，真系橋唔怕舊最緊要條女受，成功進駐女方香閨繼續「府」中作樂。而以往小心謹慎嘅Stephy，自從同王子一齊後就連番被影到拍拖。除咗因為王子冧得佢掂，亦都可能同自己已經34歲有關，再唔好好捉緊青春尾巴享受沐浴愛河嘅滋味，到時就真系蘇州過後冇艇搭喇。加上今年憑《空手道》先後奪得幾個「最佳女主角」，事業已達高峰唔使再驚「玩物喪志」影響工作啦。
難怪，Stephy同王子行完誠品，一上返車關埋門就立即糖黐豆頭貼頭，黐纏咗好一陣先肯開車返大埔香閨繼續纏綿！
BTW，畫面睇落真系似兩姊弟，仲有少少女尊男卑feel，大家有無同感？