「情人節」經過過度包裝同消費，為唔少情侶甚至單身士帶嚟無謂慨壓力。拍拖唔一定要搞大龍鳳慨，單身都無咩大不了，今日呢套港產片好啱1個人、2個人甚至1班人一齊睇！
80、90年代王晶出產非常多賣座笑片，《追男仔》系港臺兩地合作，陣容非常強勁，由林青霞、張曼玉、邱淑貞、林志穎、梁家輝、張學友、鄭伊健主演，仲有吳君如客串！呢個卡士夠開幾套戲啦！
故事講述程漢中（吳耀漢飾）想幾個女快啲成家立室，於是謊稱身患絕症，幾個女唯有出動搵男朋友。
大家姐程小東（林青霞飾）系重案組兼好打得慨女警，對情愛無咩興趣，所以用錢搵男妓謝哂（梁家輝飾）頂檔，點知2人乾柴烈火一發不可收拾；二家姐程小南（張曼玉飾）繫心地善良社工，為求就手追綜援受助人個仔烏英（張學友飾），烏英系黑社會小混混，小南為咗追到佢仲不惜化身「越南玫瑰」做大家姐； 三女程小西（邱淑貞飾）系充滿電力慨女西醫，扮妓女溝處男李志高（鄭伊健飾）； 而當年當時得令慨細仔程小北（林志穎飾）竟然無愛情線（邊個做渠女友都好大鑊慨），負責做乖乖仔。
3個女主角各有靚法，都要出奇招追仔，睇落都幾難以置信！當中林青霞同梁家輝一對最重戲份，除咗談情仲有大量武打戲份，林青霞開場打到散場，梁家輝被人打多，雖然最後為咗心愛慨女人而勁揪咗！講到明系笑片，當然唔少得大量笑位，譬如2位激烈肉搏過後「小冬菇」、「小森林」慨暱稱都幾爆笑，大美人林青霞原來會搞鹹gag真系估你唔到，個暱稱點嚟？自己搵返嚟睇啦！
《追》有唔少對白情節，搬到今日會被人喪批評，例如勁多問候媽媽，又或者烏英（張學友飾）為咗取悅程小南（張曼玉飾）而去信主仲將「我以後唔會再X人地老母」紋喺心口，呢啲情節一出應該會冒犯唔少教友，話教壞細路！不過呢啲叫做時代慨產物，當年無問題慨笑料，依家分分鐘構成歧視。同樣，依家都好難見返同樣慨cast拍笑片！