陳敏之於上年「冬至」誕下兒子雷子樂，提到她在播映中的新劇《親親我好媽》中，飾演名校教師，更是單親媽媽，拍此劇尾聲時，敏之才發現自己剛懷孕。她接受專訪時謂：「嗰陣系有計劃生BB，但冇話好勤力，就喺拍呢個劇臨尾個月知道自己有咗，真系緣份嚟！不過嗰陣未夠三個月，又唔同人講得，唯有自己小心啲。」
同老公分更湊B
說到拍劇要捱更抵夜，老公當時是否很擔心、緊張時，她謂：「佢都唔系好識處理，頭三個月自己都好緊張，驚佗唔穩，之後自己就好輕鬆，到依家做咗人媽媽，湊住一個初生嬰兒，真系好有難度。」
敏之向來是緊張大師，湊自己的骨肉當然親力親為，她笑言：「媽咪都成日幫我，畀時間我休息，老公就負責夜更，換片、餵奶一腳踢，佢算有耐性，比我想像中表現好，佢都好錫個仔，個仔唔單止系我情人，仲系我老公個情人。」
敏之即將開拍監製劉家豪的新劇《溏心風暴3》，更要一拍便拍至七月，問敏之會否不捨得經常離開兒子時，她謂：「呢套劇系剛剛懷孕時家豪哥mark咗我個期，我都好想拍家豪哥嘅劇，（有否要求拍劇時間？）冇乜，只系惆悵點樣Pump奶，身體方面我覺得仲比以前強壯，補咗身好潤，之後都會去做機修身，因為生完暫時都未可以做劇烈運動，不過而家胸同PatPat都大咗，都唔想減，好開心。」
敏之坦言拍完《溏3》後，就會停一停拍劇，專心湊仔，她謂：「做啲輕鬆啲嘅工作，時間唔太長嘅，司儀都OK，總之乜都個仔行先。」
唔擔心變怪獸家長
另外，提到《親》劇中，敏之是一名單親母親及名校教師，面對不少怪獸家長，問會否擔心自己將來都成為一份子時，她笑言：「我唔想囉！但睇情況，以前叫人唔好成日一見個BB喊就抱，但依家到自己就知唔得，我個仔有啲演藝細胞，有時喊冇眼淚，你唔理佢，佢就眼溼溼整啲眼淚出嚟，跟住我就忍唔住抱。」
敏之坦言現時與老公的話題都是圍繞兒子，故以後有老公大家有商有量，都不怕會成怪獸家長。