2020-05-24 20:57 來源：澎湃新聞·澎湃號·湃客
孫維陵 上海老底子
熟男熟女談戀愛
作者：何菲
滬語改寫、誦讀：孫維陵
推薦：丁迪蒙
點擊下方收聽音頻，時長7分09秒。
我常莊會寫熟男熟女個海派情感故事。今年夏天即將出版一本關於海派情感個新書。朋友問我情感哪能介可以分得出海派、京派、嶺南派、荊楚派……我表示，蠻難講得清爽海派情感是啥個，但是大概曉得伊勿是啥個。
勒我看來，海派情感是豐盈、細緻、獨立而又有缺陷個，還有零星個勿堪，缺陷往往連結靈魂個G點。伊個基礎體溫並勿高，露出水面個體積也勿誇張，但水面下頭個體積卻是無法估量個。勒顯搭仔藏之間，有微妙個漂移。
撥自家搭對方以恰當個進退空間，愛得剛剛好，搿個是一種文化個自覺，也顯示出伊拉對情誼個慎重搭仔珍惜。
有辰光，清雅到「歡喜儂，但我勿講出來」，腦子壞脫個辰光也會得有「從來嘸沒擁有過儂一分鐘，卻勒勒心裡失去了伊千萬次」，寂寥、惆悵裡向有得另外個一種充實，搿是勒心裡向有另外一個人陪伴下頭個清歡。
愛是啥？愛是秘密。成熟個伊拉總歸勒勒等待一個可以拿微妙、眷戀、坦率跟豁達合併表達個時機，並且打算捕捉某種剛剛好個可能性，也因為搿能，海派愛情是風致楚楚個。
伊拉往往並勿急於突破邊境，有辰光還邪氣享受平衡木一樣個狹窄空間。勒細細叫個玩味當中，蘊藏勒海伊拉對美個期望。等到辰光搭情緒撥拉成一張滿弓，再讓最後一頁慢慢而來個愛個肯定，勢如破竹。
海派情感裡有個關鍵詞：懂。一個懂字，全部勒裡向了，勿懂個人，是一頭個霧水。對於彼此懂得個人，懂勿勒啥個地方，但又是無處勿在個，就像深水裡作業，水面浪嘸沒痕跡，是心意相通、調性相近個男女個勝利。
搿搭個懂勿單單指淺表層次個「拎得清」，也包含勒卓越個讀心能力、對弈能力、調情能力搭仔心理建設能力，尊重彼此個人生選擇跟個體發展，路數清爽加37度情味，眼神交接之處，心有戚戚焉，盡顯江南文化個細膩肌理搭仔國際大都會工商業文明個冷光澤。
伊拉勿僅僅用情，還善於用腦、用心，明白勿是所有個高峰儕值得去攀登，理解彼此只是凡俗當中個微塵，哪能介勒世界浪留下來一點痕跡個價值，再是更美妙個。
人生能夠得以長恨、長憶個物事畢竟勿多，而要拿搿種情感搭遺憾譜寫成作品，搿是多少愛啊。所以十分擅長勒各種複雜情況下頭迅速尋到雙方最合適個定位，以及最大個利益所在。
人世間個勿容易，每個人個版本儕勿同，啥地方來完美個生活，只要拿心稍作些調整，一切就會得好。
未了個陳年舊債，依然萬裡風懷。海派情感多半長情。
曾經有個上海男人，連續16個中秋節勒夜報個中縫刊登一首詩，緬懷伊逝去個女友。搿個儀式堅挺而綿長。
當然咾，長情裡向必有深情，卻未必代表專情，尤其是男人。所以一方多數勿會從一而終，而另外一方倒也並嘸沒介容易脫身。
熟男熟女談戀愛，勿管結局哪能，儕蠻少會得喇叭腔個。得體是品格個輸出，背後是對人生大道搭世俗智慧個洞察搭仔經營。
（作者近照）
（朗讀者近照）
來源：「吳越小豬」公眾號
「上海話朗讀」熱文
☊ 燒賣
☊ 阿二頭，汏浴唻 ！
☊ 上海人勿怕「燙手山芋」
☊ 「悶」勒屋裡向做點啥？
☊ 舊上海個商業特色街
☊ 春彥來電
☊ 愛神花園
☊ 「老上海」祝嘉銘個硬核人生
☊ 油氽果肉長生果
☊ 上海老街
☊ 兩場「好戲」
☊ 一年不打仗
☊秤良心
☊一根筋
☊娘兩家頭
☊換了一隻大冰箱
上海老底子
每天為儂送上精彩文章一組
打開塵封的記憶，尋覓往昔的歲月
敘上海老底子事
憶上海老底子人
訴上海老底子情
以史明志，以啟未來
原標題：《熟男熟女談戀愛（上海話朗讀）》
閱讀原文
關鍵詞 >> 湃客
特別聲明
本文為澎湃號作者或機構在澎湃新聞上傳並發布，僅代表該作者或機構觀點，不代表澎湃新聞的觀點或立場，澎湃新聞僅提供信息發布平臺。申請澎湃號請用電腦訪問http://renzheng.thepaper.cn。