2020-09-15 12:43 來源：澎湃新聞·澎湃號·湃客
原創 沈嘉祿 海上夢疊
作者：沈嘉祿
滬語改寫、講述：邊秦翌
指導：丁迪蒙
飲食方面就更加接地氣了，有八寶粥，八寶飯，八寶茶，八寶蜜糕、八寶綠豆湯，菜裡向呢，有八寶菜、八寶豆腐、八寶鴨、八寶雞、八寶魚、八寶湯、八寶羊方咾啥。還有唻，儂倒是勿要講呶，就算是死脫了，到八寶山去個肯定搭普通人勿一樣個，「生得偉大，死得光榮」嘛。
八寶鴨麼是本幫菜裡向個大菜呀，假使到城隍廟老飯店去請吃飯，來一隻上臺子搿是相當有面子個，好吃勿好吃就再講唻。老飯店個八寶鴨是從蘇幫菜館大鴻運個八寶雞此地「批發」過來個，用今朝個閒話講，就是抄人家個作業了。搿歇，本幫八寶鴨倒是成為了中國烹飪協會「欽定」個名菜，其實，蘇幫菜裡個八寶葫蘆鴨具有更加高個審美水平，伊倒嘸沒進專家個法眼，蘇州人是應該是相當胸悶個。
本幫菜裡向還有道八寶辣醬，思路搭八寶鴨差勿多。㑚看看叫，本幫菜個廚師勿但去抄人家個作業，還要抄同門師兄個作業，真正是嘸沒出息呀。
必過，回頭去看看本幫菜個發展史，儂就會得發現，勒川沙三林塘大師傅抄小蘇州個作業之前，八寶辣醬老裡八早就開始燒了。只不過埃個辰光，燒起八寶辣醬來是五斤吼六斤個，儕用大鑊子燒，燒好之後再裝勒缽鬥或者木盆裡向，客人來了點一盆，廚師再拿小鑊子來燒一燒，出鑊子之後撒把蔥花，叫：「張老闆，儂個八寶辣醬來哉！」哦呦，一眼瞄過去，盆子是堆得又高又尖，周邊還汪了一圈紅油，味道呢，鹹裡帶眼甜，甜裡還帶眼辣，蠻配上海人胃口個。老底子個上海人是吃勿來辣個，本幫菜裡唯一用到辣貨醬個就是迭只八寶辣醬。
八寶辣醬是下飯個菜，吃了肉丁還有筍丁，吃了雞肫還有豬肚，豐富多彩，好運連連。
浦東老八樣裡向有得炒三鮮、扣三鮮、三鮮湯咾啥，每樣食材儕有隻配角，好隨便調配個，只要湊足仔八樣就可以了，超過八樣了麼，就更加有腔調了呀。搿種邪氣鬧猛個農家樂腔調，也迓迓叫個影響了上海人個集體性格。一百多年前個上海人就歡喜大呼隆，軋鬧猛，像廟會、花神會、三巡會咾啥，人儕是多得來行情行事，就算是人家喬家浜大戶人家死脫仔人，出喪隊伍也好拖個一裡路，圍勒海看個人照樣開心得勿得了，鬧猛呀。搿歇呢，也是差勿多個。
作者：沈嘉祿
講述者：邊秦翌
原標題：《八寶辣醬搭仔折衷主義（上）》
閱讀原文
關鍵詞 >> 湃客
特別聲明
本文為澎湃號作者或機構在澎湃新聞上傳並發布，僅代表該作者或機構觀點，不代表澎湃新聞的觀點或立場，澎湃新聞僅提供信息發布平臺。申請澎湃號請用電腦訪問http://renzheng.thepaper.cn。