網民期待已久的《詭探》第二季終於落實開拍！ViuTV去年5月推出自製劇集《詭探》，邀得「大佬孝」邵仲衡擔任男主角外，亦請來尹揚明、車保羅、蔣祖曼、駱振偉、楊偲泳、陳子豐、張雷和劉錫賢等一眾新舊面孔於劇中共冶一爐，陣容頗有新鮮感，加上此劇走懸疑驚慄路線，故事又以本地恐怖都市傳說作主打，所以劇集播出後旋即掀起話題，撞正大臺推出「十年倉底貨」《蘭花劫》，當時據內部消息人士報料，《詭探》首播後曾錄得平均收視2點，最高則有2.3點，以每點大約6.4萬人計算，最高有大約14.7萬人收看，但以數碼99臺黃金時段向來只得0.5點至1點收視而言，《詭探》的收視已較其他節目急升一倍。原本開個好頭，奈何資金不足，《詭探》劇組只能夠找到新晉編劇撰寫故事情節，直接影響劇本質素，中段開始後勁不繼，去到最後甚至爛尾，網民看罷紛紛爆粗洩憤。不過另一邊廂，《詭探》結局本身已埋藏後續伏線，去年10月ViuTV率先宣布開拍《詭探2》，正當大家認為必然是上季故事延伸，ViuTV今日在其官方facebook專頁講出最後答案 ── 說好的續集原來是《詭探前傳》，並且公布三位男主角的人選：麥子樂、遊學修、陳安立。
劇組認為麥子樂跟尹揚明頗為相似，所以邀請他在《詭探前傳》飾演年輕版「忠Sir」據了解，《詭探前傳》劇組早於3月底已聯絡麥子樂，他將會在劇中飾演尹揚明一角，即「忠Sir」（張漢忠）的年輕版。「（劇組）佢哋話覺得我好似（尹揚明），哈哈，我又唔覺得好似嘅，但40歲人仲可以演後生版，係幾興奮嘅一件事。」子樂直言，新劇大部分內容於下周三（6月20日）記者會舉行前依然要守秘密，現階段只可以透露，自己與遊學修和陳安立將分別飾演三師兄弟，遊學修的角色長大後就是邵仲衡飾演的司馬志全，而身材高、車保羅飾演的徐八強（八爺），年輕時代的他會由同樣高大的陳安立扮演。「話明係前傳，即係演佢哋嘅後生版，講緊嘅年代應該係80、90年代，個戲應該係講我哋三個師兄弟去跟一個師傅去學啲捉鬼嘅嘢。」問到師傅一角，將會由誰人飾演？子樂再賣關子：「唔講得咁多，唔透露得，呢個到時（記者會公布）就會覺得好正，我都係因為呢個原因，更加想接呢套劇，但而家唔講得住，到時大家就會知。」正因為有這位重量級演員加盟，所以子樂坦言今次劇本該有質素保證：「梗係有信心啦，因為呢位演員係好資深，（劇本）應該要過佢嗰關，佢都Pass（過關）的話，我冇理由會覺得唔得。」他補充，《詭探前傳》的劇本已寫起，預計於今年7月正式開鏡，整個夏天都要開工。
邵仲衡在《詭探》飾演的司馬志全，年輕版將由遊學修演出。談到於《詭探前傳》飾演主要角色的年輕版，子樂自信十足，因為早在無綫拍劇的年代，他已試過很多次：「以前做過好多演員嘅童年版，單係劉松仁我已經扮咗三次，分別係《歲月風雲》（演華文翰，2007年播映）、《原來愛上》（演高哲，2008年播映）同埋《蔡鍔與小鳳仙》（演蔡鍔，2009年播映）。」對於要掌握年輕版「忠Sir」一角的應有情緒，子樂認為正因為要演角色的後生時代，揣摩角色時反而沒有那麼多障礙，「我成日喺度諗，係咪要學番佢大個咗嘅行為去演呢？其實我嘅創作空間仲多，因為可能係佢（角色）老咗先會變成佢而家咁樣，所以我應該唔會好刻意咁去學佢啲嘢囉。」他說與劇組會面時，對方已略略說出演繹方向：「可能佢哋想我做到好滑頭，咁我可能就會做得更加滑頭，但係我盡量都會睇多啲尹揚明嘅戲，睇嚇有冇佢嘅特質可以用到。」
尹揚明於《醉生夢死之灣仔之虎》一戲中襯託主角任達華的演出，令子樂相當深刻，回味再三。子樂說，年輕時經常有看尹揚明的電影，「我都睇佢好多戲，我本身都幾欣賞佢，佢好有型，佢演咩戲都得。」首推例子是《醉生夢死之灣仔之虎》（1994），尹揚明在戲中飾演阿洪，他覺得這部戲很好看。「我成日睇重睇，戲入面，任達華係主角，佢係配角，成日喺旁邊襯託任達華，我好欣賞呢啲演員，因為我喺TVB出嚟都係做好多呢類戲，其實呢啲戲係好難做，你又要突出自己，又唔會搶到主角鏡，又要人哋記得你呢，係好難演嘅！」
「八爺」車保羅一角的年輕版將由陳安立扮演。在《詭探前傳》裡，子樂將首度和遊學修和陳安立合作，原來他與遊學修常常踢波，亦試過一起參演方皓玟的《Let's Say》MV做地產經紀，「同遊學修一齊拍劇就真係未試過，我覺得佢好叻，我好欣賞呢個人，因為佢唔單止表演了得，佢亦好有腦，有好多嘢Input入去畀個角色，我深信，我哋兩個火花一定會好好，同埋我同佢熟，好多嘢好易傾好易講。」至於跟陳安立的相識，同樣在足球場上，「我本身冇同佢拍過嘢，佢係一個好積極嘅人，我好鍾意呢啲人，你見到側邊有兩個都咁積極嘅後生仔，你唔可以揼慢自己，你都要睇嚇去撞到啲嘢。」為了令彼此加快熟絡，子樂說現時已和遊學修、陳安立開設三人WhatsApp群組。「我哋要做三師兄弟，但我哋本身嘅關係未去到咁close，所以我哋要嘗試去混熟，呢個係科技的進步。」
歡迎留言分享。