火雞姐丁可欣（Yanki）呢期好紅，佢用高八度嘅八婆聲拍咗條片「火雞姐搭巴士好X嬲」，鬧爆冇公德心乘客乞人憎行為，包括：
1.將黑曬嘅腳板底「朗」喺對面張櫈
2.隔籬位打乞嗤噴落你嘅大髀
3.開大speaker睇戲
4.大聲講電話
短短3日喺網上點擊逾百萬，網民激讚：「雖然佢講得有啲難頂，但完全中曬，有人代發聲，讚！」、「一開始睇中英夾雜覺得佢有啲扮嘢，但睇耐又覺得幾搞笑！」、「幾多個女仔會願意拍自己呢一面嘅表情比人睇，夠真我，我鍾意！」
搭巴士真係遇過乞人憎乘客？火雞姐話：「真係㗎，有次搭巴士去天水圍，有婆婆將腳晾上去，腳板真係好汙糟，其實有一刻諗過叫佢放番低，但驚引起口頭爭執，老人家始終固執，費事有口角，但呢件事記住喺心，真係好核突，就係因為婆婆，所以諗到拍片講喺巴士好憎嘅人，其他嗰啲事都係真，全部遇過曬，唔係博人鍾意睇亂講。」對於點擊過百萬，火雞姐話：「好開心，自己睇留言都好興奮，冇諗過咁誇張。」
火雞姐搭巴士仲有乜奇遇？佢話：「其實有次好特別，我喺天水圍搭巴士去九龍灣，因為收工時間比較多地盤工人，可能佢哋因為工作關係，講嘢比較大聲，有次我坐喺上層，有個工人坐我入面，另一個工人坐我左面，即係一左一右，佢哋一直喺度好大聲對話，我坐喺中間勁尷尬，向前又唔係，向後又唔係，成程車勁辛苦勁嬲，我戴咗耳塞，校到音樂最大聲，但都係一直聽住佢哋圍繞住我講嘢，好忟！」
雖然遇過咁多衰乘客，但火雞姐唔會以惡制惡：「我都唔會硬碰硬，唔會惡言相向，反而有禮貌問：『唔好意思，可唔可以坐番過少少。』咁樣可以避免拗撬，可能佢聽落去會舒服啲，即刻讓番個位畀你，所以我通常會對佢哋有禮貌嘅。我都好開心有咁多人對坐巴士條片咁有共鳴。其實我拍呢條片，都係想畀大家知道，原來巴士上做呢啲行為，其他乘客可能唔鍾意，拍完我都諗自己有冇做過，可能自己真係有試過咁做，希望大家睇完片，唔好做呢啲行為，搭交通工具可以舒服啲。」
差啲唔記得講，佢係狄易達師妹。
火雞姐呢期好紅
呢個表情，網民都好like。
火雞姐話當時見到唔出聲係驚引起口頭爭執，所以拍片。
火鷄姐更多的搞笑視頻請到以下網址觀看：
https://www.youtube.com/watch?v=z8eoOwo3UsE
點擊「閱讀原文」有片睇！