西曆十一月十一號，據說，呌「光棍節」，以供單身一族慶祝云云，廣東人亦樂於「光棍」前「光棍」後自稱。實情，廣東話之「光棍」另有意思。
有句說話呌「財到光棍手，一去冇回頭」。何解？從一碌「光棍」身無長物而聯想到靠偷呃行騙維生，「光棍」即「騙子」，被其騙去之財當然冇可能攞得返。另有兩句歇後語：光棍佬教仔——便宜莫貪、光棍佬教女——切勿蝕底，光棍利用人之貪念行騙，自己著數，人哋蝕底，以「搵食」經驗教導仔女，定必警戒勿貪人財，勿虧於人。
仲有一句俗語「光棍佬遇著冇皮柴」，「冇皮柴」光捋捋，查實又係一碌「光棍」。成句話意思係「騙子撞正騙子」、「古惑鬥古惑」。五十年代有齣電影《光棍姻緣》，講主角梁醒崇同梁珠兩兄妹同告失業，於街頭謀生處處碰壁。崇到酒店冒充富翁，望能結識貴人，偏遇上光棍阿鳳招搖撞騙。崇、鳳終敗露身份，卻締結良緣。戲名意思，並非「單身男女之姻緣」，而係「兩個騙子歡喜冤家變情侶」，正係「光棍佬遇著冇皮柴」。即使未睇過呢齣唐山舊片，亦聽過男主角梁醒波唱嘅經典插曲：「擔番口大雪茄，充生曬認經理，撈世界要醒目，一於當玩把戲之嘛……」
廣東話中，用於稱呼人嘅詞語甚多，但包含「棍」字嘅稱呼，九成九都唔係形容好人。諸如「惡棍」、「賭棍」、「淫棍」、「狀棍」、「學棍」、「善棍」、「攪屎棍」等。唔知，你仲有冇興趣過「光棍節」？