如果我係無綫，夜晚播完《衝上雲霄》之後，即刻就應該重播《大時代》，襯曬而家嘅大時代氣氛，保證收視率爆燈。而家嘅大時代個勢，真係邊個冇貨喺手，邊個就激到要學丁蟹跳樓。
我平時寫稿係寫曬成篇之後，先去諗條題。唔寫完，點知道篇文如何點題？今次唔同，未寫已經諗到題目，無其他可以襯得起佢嘅氣勢。
我師傅問我，炒股票，莊同閒有乜分別？我點知。佢話分別在於閒嘅齋睇股價，莊就係睇市值。港交所（00388）股價未創新高前，計市值已經超越當年三萬點。計股價，閒已經非常開心，賺大錢，隨時想沽貨。做莊嘅，就要睇市值夠大未，夠唔夠做嘢。唔夠嘅，再推高啲市值，股價只不過係工具二選其一，另一件工具，唔使問，梗係股票。
我師傅話，港股突然間狂牛出籠，唔係乜嘢價值投資，唔係乜嘢要re-rating，純粹市場有大錢狂買上去。而呢堆錢擺明就係阿爺喺上面放落嚟，唔係民間嘅錢。如果係民間，老早就「港股通」嚟咗，使鬼以前日日用剩咁多餘額？突然間扭大水喉放水，一定係諗過度過，唔會係心血來潮。阿爺做莊，就要用莊嘅心態諗佢搞乜。目的唔係推高股價，係推高市值。
阿爺做莊 想推高市值
做莊嘅無端端做乜要推高市值？得兩個原因：一係散貨，一係做大交易。市值太細，做交易好唔方便，點擺一啲大嘢入嚟？一定要巿值去到咁上下，先可以擺項目又得，批股又得。普通莊推高一兩隻股票，已經氣來氣喘，嗌曬救命。阿爺做莊，雷霆萬鈞，要推高成個香港嘅市值。嘩，仲唔大開眼界。
而家明白點解要搞「滬港通」啦，北上買A股從未試過爆燈，單係內地人已經買到A股4000點，成交成萬億，根本唔係當初所以為，要引外國資金救A股。但係你睇，買港股一經撳掣，3000億成交，一日可以升1700點，南下配額用爆，「滬港通」而家先揭曉真正用途。
我師傅話，點解要推高香港市值？有任務。記唔記得中信（00267）買曬母公司資產，將國有資產變曬一間香港上市公司？你唔會認為只此一次，下不為例啩？要買國有資產，首先要上曬市嘅國企要有番咁上下大隻，又可以搣少少股票就集到資，先可以抬畀阿爺買國有資產。如果國企細隻，搣一大堆股票先集到少少錢，有鬼用？你用股票換阿爺資產，阿爺手揸一大堆紙，沽又沽唔到，又有乜用？將國企推到隻隻變曬巨無霸，批股集資用錢買阿爺資產，呢樣就係香港報答國家嘅最大功勞。
推高香港市值要有技巧，齋推，鬼佬會同你推番落嚟。如果明知有莊要推高價錢，儍嘅都知會到時到候沽貨畀你，你實接，典型打荷包方法。要推得連鬼佬都同你癲，技術就係要先推A股，搞到AH股有差價，咁推港股度氣勢就會變成決堤式，擋者披靡。昨天期指15分鐘可以升千七點，連鬼佬都幫手推一把炒一轉，就知道阿爺想要向上呢度勢，大家都收到，乖乖地企埋一邊，唔好阻頭阻勢。
點解要用香港？兩個原因：香港批到股，集到資，可以攞到全世界嘅錢畀國家用。其次？炒得勁得滯，始終有日會爆，爆咗對經濟有影響，會有好多人冇嘢做，好多人會窮好耐。香港人少，爆得起。A股爆，牽連好大，隨時要權力執位。原子彈掟落廣島而唔係東京，唔係因為掟唔準，係唔想滅人國。香港就係有呢個功能，抽到條生死籌要幫阿公做嘢，做完衰咗入去坐幾碌，出嚟之後只係浪費幾年青春，最緊要阿公冇事。我師傅話，啲財經專家之前話會見二萬六，笑死人。今次咁嘅氣勢，四萬點都得。A股由二千升到四千，點解香港唔可以二萬五升到四萬？點數大十倍，唔代表難度大十倍。反而A股由四千點升多二千點仲難。
咁即係點呀師傅？咁即係話，國企未完成印股票買資產呢個動作，個市都唔會冧，有人昨日已經醒咗貼市畀大家。財爺話，升市好正常，投資者小心啲，但冇爆煲危險。你幾時見過財爺會咁講嘢㗎？佢梗係驚死你輸錢鬧佢，你走寶反正唔會死得人。連官都話冇爆煲危險，你仲唔醒水？
我聽完師傅咁講，更加印證阿爺聰明到暈，乜都諗到齊輯輯，度好曬戲本先嗌action。香港人唔會夠阿爺鬥，大家有嘅資源同歷練唔同，佢睇嘢嘅高度係你想像唔到。佢喺天度伸隻手嚟同你打莊，你邊有得走。快手，撳定錢，瞓身買莊，贏咗佢仲唔使抽水。（方卓如）