Hello，大家好，差唔多有一個月未更新啦！最近因為我要同小朋友上粵語堂，加上囡囡又放暑假，帶佢去興趣班，比較多事，所以暫時冇更。
琴日系一年一度嘅粵語日（節）。以下圖片解釋分別嚟自百度百科同360百科。
前幾日學緊溜冰有兩個家長喺度傾偈，聽到囡囡同我交流都系用粵語，互相就問起對方小朋友識唔識粵語，可惜，佢哋小朋友都唔識。
有個家長覺得讀書反正要普通話，學粵語就會唔識普通話拼音，對日後考試冇幫助，所以唔教小朋友粵語。
因為迫於應試，可能就系造成而家粵語式微現象嘅原因。
其實，我哋以前都系上堂先用普通話，私底下同同學、老師交談都用粵語，完全唔會令到我哋唔識拼音啊。
到高年級啲考試，基本唔會寫拼音啦，又唔會有出拼音寫漢字嘅題目，關鍵系閱讀同寫作能力。
而粵港澳都有好多出名作家，唔一定要講普通話先識作文。以前啲詩人都唔系用普通話作詩啦。
另外我2018年之前打字都用普通話拼音打，之後Google發明咗粵語拼音打字，我轉用粵拼。
2019年搜狗又發明粵拼，輸入更便捷，我就轉用搜狗啦。粵語同音字少，基本一打就出，唔使普通話拼音要搵好多頁先搵到字。
P.S:囡囡學溜冰嘅興趣班系天生專業滑輪，喺鈺海名門2樓，教練好好，好專業，有興趣學可以搵佢，室內溜，無懼風雨。
教練好有愛，仲會整棉花糖畀啲小朋友食。
就算溜嘅唔系真冰，廣東人都慣咗叫溜冰，只不過系溜旱冰。溜冰lau4 bing1。又或者叫「踩caai2/跴jaai2 roller"，因為roller-skating系溜冰嘅英文。好多時候，廣東話會夾雜英文嘅，呢啲唔系廣東人英文叻或者扮嘢，而系一種語言習慣，以前中英交流多嘅結果。溜冰鞋仲會叫「雪屐」syut3 kek6，所以溜冰都會叫「滑雪屐」waat6 syut3 kek6。好啦，話唔多講，我哋繼續嚟睇第三集卡通片啦！大家可以留意字幕，對比語言用字習慣，多聽多學習。
希望大家鍾意今期內容，下一期再見！