崔建邦丨又做賤男 偷食林珊珊細女 屋企開拖當眾X襲擊廣州女友

拍拖初期，崔建邦同 Kelly都好恩愛，崔建邦曾為她戒酒，但維持唔夠半年，崔建邦就回復真面目。《蘋果日報》圖片

娛頭

又做賤男　偷食林珊珊細女　

屋企開拖當眾 X　崔建邦襲擊廣州女友

崔建邦同細十四年、今年 23歲的廣州 model女友陳嘉莉（ Kelly）拍拖一年半，最後因為崔建邦賤男本性難移，導致分手收場。

死性不改的崔建邦，脾氣暴躁，經常搵女友做出氣袋，試過喺屋企開拖，襲擊 Kelly，導致對方身體受傷。但最令女友忍無可忍，決定斬纜的是發現男友偷食，至於崔建邦偷食的對手，竟然是林珊珊次女李怡（野人）。

兩次斷正

崔建邦同有「翻版吳千語」之稱的 model陳嘉莉（ Kelly）拍拖一年半，去年八月，更一度傳出兩人會閃婚，不過始終敵不過崔建邦賤男天性，兩人本月初正式分手，原本與男友同居的 Kelly，亦已經搬離崔建邦寓所，獨自在太子租樓自住。

Kelly決定狠飛崔建邦，主要原因是戒唔甩「偷食」陋習，不時背住女友在外「覓食」，仲要偷食唔抹嘴，去年九月，被 Kelly發現。

「一開始，所有朋友都叫 Kelly諗清楚， Amigo（崔建邦）個底實在太花，次次拍拖都偷食，佢呢隻人根本唔會尊重人，更加唔可能對一個人專一。 Kelly就梗係唔聽，覺得個男人對佢好好，好遷就佢，亦一啲都唔覺得佢花心。直至幾個月前，俾 Kelly發現， Amigo鬼鬼祟祟約個女仔出街，又互 send情慾短訊。」 Kelly身邊人說。

據知，二人為了這件事曾吵大鑊，當時崔建邦解釋是對方死纏，並保證冇下次和同對方斷絕所有關係，經慣匪崔建邦誓神劈願，最終得 Kelly原諒。

不過，爛滾的崔建邦點可能忍得住唔偷食？去年十二月尾，同該名女子一直保持食散餐關係的他，相約夜蒲唱 K幽會，其間有人向 Kelly通風報信，當場斷正！

「事後 Amigo又認錯！話係個女仔成日搵佢，自己唔好意思，所以先去見嚇對方。今次 Kelly冇咁天真啦！佢唔再信 Amigo，仲決定分手。」

因為曾被 Kelly發現過，崔建邦與李怡曾斷絕交往一陣，但女方明知他有女友，繼續咬住唔放。

林珊珊有兩個女，包括大女李澄「西瓜」（左一）同細女李怡「野人」（中），她們三母女感情要好，「野人」更曾上載與阿媽遊水的泳照到社交網站。

摸黑談心

上月平安夜（十二月二十四日），本刊已發現當時尚未甩拖的崔建邦，背住女友 Kelly偷食，賤男的對手竟是綽號野人的林珊珊細女李怡。

當晚十一點，崔建邦車住李怡出現藍田麗港城，泊低車一齊行去便利店買雪糕，兩人食住雪糕睇扭蛋，但每次見有途人經過，崔建邦都會立刻藉故彈開，同李怡保持距離扮唔識。

之後二人行去漆黑一片的麗港城公園散步傾偈，直到搵到更暗和有不少高身植物遮擋的隱蔽位，兩人在內逗留了十五分鐘，才齊齊行返出來。

跟住崔建邦再車住李怡，到同樣極少人的啟德郵輪碼頭，點知去到發現封路，不準車輛駛入，崔建邦惟有轉移陣地，駛去飛鵝山方向，原以為他是返去位於飛鵝山腳的峻弘寓所，點知崔建邦朝住車震勝地方向直駛上山，但中途懷疑有記者，於是踩盡油撇甩記者。

經事後了解，當日 Kelly身在內地工作，所以崔建邦有機可乘。

去年平安夜，崔建邦趁當時未分手的女友 Kelly不在港，於是同李怡拍拖夜遊情侶勝地。

買完雪糕在便利店外睇扭蛋，其間發現有途人眼望望，崔建邦即擰轉面同李怡扮唔識。

怒掟 iPhone

屢次偷食是分手導火線，但這段只有十八個月的關係，之間亦問題多多。○九年同中巴拍拖，試過鉸剪腳箍頸打女友的崔建邦，原來都有對 Kelly動過粗。

「早排見到 Kelly隻手瘀咗一笪，問佢乜事佢就話係撞親。我哋唔信係咁再追問佢，先知係俾 Amigo用個 iPhone一嘢飛埋去，佢避唔切俾佢掟中手臂；但 Kelly事後話冇嘢，已經嬲完冇事啦！我哋知嘅，就係呢次，都唔知只唔只一次。」知情者說。

脾氣暴躁的崔建邦，亦試過當住自己的朋友面前，用粗口狂 X Kelly。

「上年我哋同 Amigo、 Kelly一齊去馬爾地夫玩，咁有日 Kelly唔知係唔方便定唔想曬太陽，大部分時間都匿埋響樹底， Amigo叫咗佢幾次落水玩佢都唔肯；點知 Amigo突然癲咗咁指住 Kelly鬧，仲爆曬粗，所有性器官同阿媽都出曬場， Kelly好尷尬，我哋都冇人敢出聲，之後 Amigo仲趕埋 Kelly返房。」崔建邦身邊人說。

不知是否因為被崔建邦襲擊過， Kelly現在學打拳自衞。

上星期日， Kelly趁冇拖拍，於是去了做義工，派福袋給老人家，更落手落腳擔檯擔櫈。

粗口辱罵

崔建邦的惡行，在電視城同樣臭名遠播！事緣有次崔建邦同 Kelly在的士發生爭執，又狂爆粗鬧女友，事後的士司機接載另一位藝員時，將崔建邦粗口辱罵女友一事「直播一次」，因而傳遍將軍澳電視城。

「 Amigo大男人又自卑！只要覺得女友唔聽佢講，唔照自己指示做，佢就會發癲；如果飲埋酒仲大鑊，脾氣會發得更大，失曬控咁，亂掟嘢同鬧人。」

脫離崔建邦魔掌後， Kelly已搬到太子獨居。星期日（一月二十四日），她到油塘社區中心做義工派福袋給老人家，又幫手搬搬抬抬。第二日傍晚，記者發現 Kelly搭港鐵過港島，並上了一間位於灣仔的拳館，受過傷害，要學番兩招傍身。

本週一，分別搵了崔建邦及 Kelly回應分手一事，兩人都承認已分手，至於是否與第三者有關，二人都沒有否認， Kelly表示：「過咗去嘅嘢唔想再提。」

記者問到 Kelly老闆娘 BoBo（李月），知唔知 Kelly分手一事，她戥 Kelly唔抵：「有時 Kelly返公司見佢唔夠精神，佢話因為男友成日飲醉酒，喺凌晨打電話俾 Kelly要 Kelly出去接佢，同埋有聽過個男人成日發脾氣，咁 Kelly始終係細路女，唔敢反駁。」

兩年多前， Kelly來香港做 model，簽約 Mandy Lieu旗下的 model公司。 

直認分手

晚上九時， Kelly練完拳離開，被問到與崔建邦的關係時，她直認已經分手，但未有透露幾時分開和原因。

「呢啲你問番佢（崔建邦）！（同第三者有關？）其實過咗去嘅嘢我唔想再提番，唔好意思！」 Kelly說。

跟住記者向 Kelly展示崔建邦同李怡幽會的相片，問她是否認識相中女子， Kelly望了三秒，然後搖頭話唔識。

至於被崔建邦施襲及粗口狂鬧， Kelly表現更加愕然！

「過咗去嘅嘢，都係唔想再提。（仲有冇聯絡？）冇點聯絡。」問她屋企人知不知崔建邦的惡行時， Kelly委屈地垂低頭，沒有回應。

同日的下午，崔建邦現身太子買養魚用品時，被問到是否因為有第三者而分手，他沒有否認。

「我唔答啦，都分開咗！我而家係單身嘅，男女嘅嘢……係咁啦，俾啲空間我啦。（咁係咪有第三者？）我唔回應啦！」崔建邦說。

拍拖初期， Kelly曾在 Ig寫過崔建邦是她爸爸以外，最照顧佢及呵護佢的人。

崔建邦與李怡用上同款唔同色情侶電話殼。

賤男實錄

情慾短訊

幽會斷正

沙灘爆粗

怒掟 iPhone

的士狂鬧 賤男幫

偷食打老婆瘟小三，親手破壞一段感情亦毫無悔意的賤男，娛圈亦有一幫。

羅仲謙

10年羅仲謙同傅穎（ Theresa）拍拖唔夠一年， Theresa發現對方一腳踏四船，同北京正印從未分手之餘，做港姐嘉賓跟大隊去印度拍外景又連嗒三女。分手後， Theresa公開指責曾被男方毆打，更展示遍布手、腳及屁股的傷勢。

周永恆

14年，周永恆被老婆阿 Yu揭發搭上助手 Ruby，導致二人婚姻破裂，躁底周永恆更一度動粗，出手打阿 Yu，令她下巴及面部受傷須送院縫針，結果周永恆因家暴被法庭判守行為 18個月。

姜皓文

98年，姜皓文（黑仔）瞞住女友金慧英搭上陳梅馨，三角關係搞到家嘈屋閉。其後，黑仔更到金慧英家發爛，連摑女友十幾巴，打到金慧英口腫眼腫，翌日金慧英開記者會，將傷勢公諸於世。經過幾番波折，最終二人都拉埋天窗。

沒有最賤只有更賤

偷食、打女人、醉駕，接二連三惹上官非，崔建邦形象誠信早已破產，雖然屢獲無綫高層特赦放生，依然死性不改，堅持做人渣。

背唐詩詠偷食

05年因為合作主持《 K-100》同唐詩詠撻著，其間崔建邦繼續見一個追一個，但女方依然死心塌地，直到毆打「中巴」事件曝光，唐詩詠才主動嗌分手。但唔夠半年，崔建邦趁女方喪母，出盡冧招箍煲，二人再度復合，但死性不改的崔建邦又再被斷正「偷食」郭思琳，二人拖拖拉拉， 14年崔建邦新歡陳嘉莉曝光，關係正式告一段落。

打「中巴」

09年，崔建邦同拍拖四個月的「中巴」鄺慧敏發生爭執，女方報警驗傷，事後「中巴」更召開記招，狂數崔建邦曾三次向她出手，叉頸、鉸剪腳兼搶手機，「中巴」更即場展示傷勢。

醉駕被捕

10年 10月，崔建邦揸車途經將軍澳警方路障，被斷正醉駕遭當場拘捕，最後獲輕判停牌 9個月兼罰款 6,000元，但停牌期間，又被拍得駕車返回西貢村屋，罔顧法紀。

Open野人

林珊珊二十六歲細女李怡（野人），在國際學校讀番書，常以低胸熱褲示人，又不時於網上曬三點式沙灘照，性格 open！ 14年，李怡加入「NuSkin」傳銷行列，於展銷會落力推銷「回春機」，近日則改到瑜伽服飾店當售貨員。感情方面， 11年李怡硬撬黃泆潼男友，斷正與廿四味成員陳偉雄（阿肥）拍拖，導致對方四年情玩完，其後更在 Instagram中流出李怡跟阿肥的親密床照，二人赤膊女方又一臉陶醉，遭母親林珊珊強烈反對。

廣告新寵

現年 23歲的廣州女模陳嘉莉（ Kelly），細崔建邦 14年，入行前修讀廣告設計。 13年，由廣州來港發展，簽約「 QUEST MODELS」旗下，成為 Mandy Lieu師妹，不久後已有機會和湯唯、 Angelababy及彭于晏合作。為去除鄉味，公司特別安排她學廣東話及英文，短短三年間， Kelly拍超過廿個廣告，由相機女郎到 now電視廣告，曝光率急升。

近日， Kelly更與韓國紅星金秀賢合作拍廣告，代言天然泉水。擁有 32、 24、 34三圍、臉孔標致的她，甚得廣告商垂青，更被外界稱為「翻版吳千語」，是廣告界的新寵兒。

新聞來源/香港各大新聞網站

雜誌來源/壹周刊1351

編輯整理/臺叔

微博©香港TVB資訊臺