基斯坦奴朗拿度雙喜臨門，但就偏肯娶畀伊蓮娜入門！昨日凌晨歐國杯外圍賽I組，葡萄牙作客丹麥戰情亦陷入膠著，踢到補時階段至靠C朗頂入頭槌絕殺贏1比0，再度飾演救世主角色，同時間佢成為首位Facebook粉絲人數突破1億大關嘅運動員，心情大靚製作靚片多謝Fans。不過呢個成功男人背後嘅女人伊蓮娜早前催婚，可惜C朗話要Hold住先，現階段要以事業為重喎。
助葡萄牙取首勝
C朗雖然受到左膝傷員困擾，不過昨日鬥丹麥照樣正選搏殺兼踢足全場，即使佢不停被丹麥擁躉大嗌「美斯、美斯」騷擾，喺下半場補時5分鐘嗰陣仲愈叫愈勁，卻激發出C朗嘅小宇宙，喺94分50秒接應哥利斯馬傳中波以頭槌頂入全場唯一入球，協助葡萄牙取得I組首勝。賽後葡軍主帥費蘭度山度士激贊C朗，話換著第二個球員根本頂唔入呢球之外，贏波功臣C朗更重申葡萄牙為I組最強隊伍，誓以小組首名躋身決賽周。
其實又難怪C朗信心爆棚嘅，事關獲名醫利普爾證實傷勢並唔嚴重，極有可能毋須做手術治理嘅佢，今年內喺皇馬同葡萄牙嘅賽事，上陣44場攻入45球，入球效率贏曬51場41球嘅宿敵美斯外，仲得到西班牙《阿斯報》同哥倫比亞名宿華特拉馬力撐贏硬今年嘅金球獎，加上昨日成為首位FB粉絲人數突破1億大關嘅運動員後心情大靚，仲特別製作短片答謝球迷支持。
事業為重 唔結婚住
喺條片入面，C朗先自己親身講嘢多謝粉絲，又搵啲細個同成名路嘅相，跟住就用番Facebook嘅相，第1張就放同囝囝合照嘅相片，大Sell溫馨，不過就冇女友伊蓮娜，或者C朗仍然事業為重，葡萄牙傳媒指伊蓮娜早前逼婚，但C朗仍然話Hold住先。
其實伊蓮娜已經唔系第一次向C朗要求名份，今年4月佢接受雜誌訪問時講到明非C朗不嫁，4年前亦曾爆出呢名索模主動出擊，向C朗求婚，甚至話已經買曬新豪宅準備婚事，但最終件事又系不了了之。