胡定欣、姚子羚、曹永廉、張振朗等現身機場，為無綫劇集《包青天再起風雲》出發前往橫店及新彊拍攝外景兩個月。有廿多位粉絲送機的胡定欣笑說：「我係去日本，要將心情調節到唔係去橫店，哈哈！因為出發前呢幾日心情真係down down哋，好耐冇試過離開香港兩個月，上次已經係《大唐雙龍傳》，今次有啲掛住屋企，同埋要由橫店轉去新彊拍攝，有好多未知之數，都有少少擔心。」
胡定欣今次到內地拍攝兩個月事前準備了不少日用品，兩篋行李已經超重，她笑說：「女仔有好多貼身用品，要帶定化妝品、護膚品、洗頭水、電腦、三十集嘅劇本都好重，仲有返嚟做舞臺劇嘅書籍呢！」
問到胡定欣會否趁旅程安慰甩拖的好姊妹姚子羚﹖她說：「佢OK㗎喇，唔使擔心佢，佢都已經交代咗，畀啲時間佢哋處理，佢哋都經歷好多。（姚子羚平復心情未﹖）OK，唔使擔心，上到去會focus喺工作。（會否戥佢哋分手可惜？）兩個都係好朋友，當然想見到佢哋開心，大家畀多啲空間佢哋休息嚇。（你呢排陪住佢？）冇喎，大家出發前要準備，本來想約佢食餐好啲都冇時間。（鄭子邦傷心到去咗尼泊爾修行﹖）唔清楚，我覺得拍拖冇人想分開，大家唔需要揣測，唔好成日問住佢哋，子羚要講嘅都講咗。」
姚子羚與圈外男友鄭子邦拍拖三年以來一直愛得甜蜜，屢傳婚訊，沒料三年情近日突然爆出畫上句號。
目前關係好好
今早，姚子羚、胡定欣、曹永廉、張振朗等現身機場，為無綫劇集《包青天再起風雲》前往橫店拍攝外景。「分」訊爆出後，姚子羚首度公開露面回應，她心情看來不俗，似乎未有受情變影響。講到心情如何，她說：「都OK嘅，因為要講嘅都已經講咗。（鬆一口氣？）都會嘅，同埋都係我哋兩個人嘅決定，我哋關係依然好好。（三年情告終可唔可惜？）有聚有散，世界係圓嘅，永遠唔知將來會點，總之依家呢一刻，我哋覺得呢個相處方式係最舒服。（分咗手幾耐？）詳細唔講，或者可以講係用另一個方式去相處。」
分手唔關姊妹事
姚子羚與鄭子邦分手，有指是因她及其好姊妹逼婚，令關係由「婚」變「分」。問到姚子羚是否在結婚問題上與鄭子邦出現分岐？她說：「絕對唔係，呢樣嘢真係好想去澄清，唔係外間所講嘅結婚問題、逼婚問題，都要幫我身邊嘅好姊妹澄清，絕對唔係因為逼婚、結婚問題。感情係兩個人嘅事，我亦都相信我哋一路係朝住呢個目標去進發，但係可能過程裡面出現咗一啲相處上面嘅嘢，但係唔需要用唔好嘅心態去面對呢件事，我哋只係換咗第二個相處嘅方式，大家又舒服咗，將來嘅嘢亦冇人知。」
前男友咁啱出走學佛
姚子羚今次到橫店及新彊拍攝兩個月，問到分開一段時間可有復合轉機？她說：「冇諗喇，專心拍嘢，仲諗咁多咩？我都係嗰句，我哋嘅關係依然係好好，依然會聯絡，好開心一對情侶去到最尾唔需要鬧交唔開心收場，依家呢個關係目前係最好嘅。（阿邦傷心去咗尼泊爾修行？）唔係，佢係佛教徒，呢個旅程計劃咗好耐，佢平時都去唔同地方學佛，對佢嚟講係最開心，只係咁啱得咁橋。（去拍嘢兩個月分散咗分手心情？）都係嘅，不過就算係香港都OK，大家關係良好，所以唔會有大影響，不過當然離開咗就可以專心做嘢。」
撐前男友好好
姚子羚除感謝一班好姊妹支持，還感謝粉絲及不認識的朋友留言打氣，她說：「希望大家畀多啲空間我哋，同埋阿邦真係好好嘅，希望大家唔好以為我逼婚不遂，佢又對我唔好，係絕對冇咁嘅事，我哋嘅關係好好，佢對我好好。」姚子羚也強調今次分手與第三者無關。問到可接受新戀情？她說：「暫時未，哈哈，冇諗，緣分交畀個天，要嚟嘅始終會嚟，未到最後永遠都唔知道，情侶、結婚都有可能分開，隨緣啦。」