《她她她的少女時代》正式首播，古仔講述田蕊妮飾演嘅方迎風人到中年，營役半生，以為自己好幸福嘅時候人生卻迎來劇變！飾演佢老公嘅曹永廉出軌，女兒離巢，佢積極頑抗，但就體力衰退、與社會脫節。種種挫折與衝擊，迫使佢面對過去嘅失敗，重新振作，更重拾對搖滾嘅熱情，再次出發，為自己再活一次！
田蕊妮（電視截圖）
劇情好似似曾相識？其實係1994年經典話題作《再見亦是老婆》嘅新世代版！由於劇情主要探討當年Hit爆嘅婚外情話題，此劇甫播出隨即大受歡迎，引起社會熱話，劇集仲成為當年最高收視港劇。
（劇集海報）
該劇以細膩手法刻劃夫婦家庭生活，感情親切，故事寫實引起觀眾共鳴，唔少師奶睇到喊得一句句，女主角陳秀雯當年憑"肥師奶"一角大受歡迎，攀上事業巔峰。該劇講述陳秀雯飾演嘅袁珮珮同姜大衞飾演嘅丈夫於禮和原本家庭美滿，育有一對子女。
本身姜大衞係一個模範老公兼老竇。（電視截圖）
但姜大衞被周嘉玲飾演嘅美艷女星卓羚所吸引而拋棄了家庭，最後經歷了各種變故後挽回了夫婦感情。
肥師奶仲懵盛盛信曬老公！（電視截圖）
睇到師奶們咬牙切齒！（電視截圖）
女人當自強呀！（電視截圖）
《再見亦是老婆》喺首播完畢後僅四個月就安排喺翡翠臺深夜時段重播，乃無綫罕有在劇集首播後不足一年即重播，之後在1999年曾再次重播，可見其受歡迎程度。除咗劇集本身之外，由彭羚主唱嘅劇集主題曲《仍然是最愛你》同樣Hit爆；無獨有偶，《她她她的少女時代》由周志康主唱嘅劇集主題曲《少年時代》同樣被狂推。
周志康喺劇中都有一角，飾演年青版李思捷，係田蕊妮少女時代嘅偶像。（周志康IG）
其實相類似嘅題材真係拍極都唔厭，2010年嘅臺灣偶像劇《犀利人妻》都係以相類似嘅題材包裝，收視同樣高企！唔知《她她她的少女時代》可唔可以再掀起一輪煲劇熱潮呢？
《犀利人妻》劇集海報
左起：姜大衞、姜大衞妻子李琳琳、姜大衞長女姜依蘭及女婿曹永廉（東星娛樂）
咁啱得咁橋，25年後姜大衞女婿曹永廉又演番面對同一個情形嘅負心衰老公，好邪呀!