林敏驄日前錄影無綫節目《Big Boy Club》宣傳佢個演唱會，全程發揮佢無釐頭兼問非所答本色，玩到主持人林盛斌（Bob）都差啲招架唔住！節目一開始阿驄已經掌摑Bob，跟住Bob就問阿驄「你今日冇咩嘢嘛？」然後阿驄就即場踢爆Bob遲大到近一小時，連陳國峰都出口話：「未夠一個鐘，58分鐘啫」，Bob就繼續死撐話佢冇遲到，係林敏驄早到，節目一開波已經火藥味甚濃。
去到節目中段，林敏驄再度出招寸爆阿Bob做主持做到口窒窒，冇做好準備工夫，不過阿Bob咁有經驗，就即刻將個波射番畀阿驄，佢話：「由你個口講出嚟先好㗎嘛！」點知阿驄一啲面都唔畀：「你個口好臭呀？我以為你冇頭髮啫，腦都冇嘅。」耍到Bob暈佗佗。
以為就咁完？點知去到節目尾升仲有高潮！講到作曲工作時，阿驄就話唔夠阿BOB撈，佢婚宴、殯儀都接，阿Bob就話：「驄哥，殯儀真係冇接。」跟住Bob就大反擊話有興趣幫林敏驄主持殯儀，林敏驄即刻笑言話擇個日子。
而節目播出後，Bob就尋晚喺微博回應被林敏驄寸爆一事，佢話：「佢話我遲到，我咪話佢早到囉，佢話我搞殯儀，我咪話會幫佢搞靚佢囉，而嗰d（啲）鬱手鬱腳，互寸互窒，其實都係為個節目搞氣氛，大家真係唔駛（使）咁認真嘅，唔通你會預期佢會乖乖地（哋）坐喺度，我哋正正經經問，佢又正正常常咁答咩？個節目都係想輕輕鬆鬆，希望觀眾睇得開心，啱啱我終於睇返（番）第一集，真係幾好笑！」
而林敏驄接受東網訪問時謂：「佢冇遲到，我哋好熟㗎！兄弟咁，搞嚇氣氛啫！我哋係friend先咁玩。（你打到佢好應喎！）唔打到啪啪聲邊有咁嘅效果，我以前都成日畀志偉打啦！我同Bob好老友，我哋拍嗰套電影之後都上，佢之前幫我做演唱會記者會司儀，都冇收錢，係啲人唔知頭唔知路先咁敏感啫！」問到正式演唱會時會否請Bob幫手，阿驄又搞笑謂：「我有請佢嚟做security，不過佢嗰兩日要去搵人仔。」