歐冠8強賽終於落下帷幕啦
經過8場激烈比拼
4強終於誕生
拜仁慕尼黑有驚無險擊敗西維爾
兩年後重返歐冠四強
高普兩回合戰術壓制格迪奧拿
利物浦雙殺曼城時隔十年翻四強
祖雲達斯功虧一簣逆轉失敗
皇馬有望三度蟬聯歐冠
最經典莫過於這一場比賽
羅馬盪氣迴腸逆轉不敗之師巴塞
拒當大禮包
今期嘅話題就係講大逆轉
歐冠史上實在有太多第二回合嘅翻盤故事啦
上賽季巴塞上演魯營奇蹟
史詩般逆轉巴黎，成就一段佳話
不過今日講嘅並唔係大逆轉咁簡單
因為類似首回合大比分敗北
第二回合實力逆轉，大多數都係強隊
類似拜仁當年首回合1比3輸俾波圖
第二回合德甲巨人搵翻狀態
翻到安聯6比1打到波圖冇鞋挽屐走
巴塞逆轉AC，皇馬逆轉狼堡
大家都會覺得，只要三軍用命強隊逆轉係理所當然
雖然巴塞逆轉巴黎不可多得
但至少擁有MSN嘅巴塞實力始終強過巴黎
但係如果實力較弱一方
首回合有輸得一敗塗地
賽前基本冇人睇好會逆轉
但最終突然爆種，上演奇蹟嘅劇本實在唔多
下面就同大家分享下
五場真正嘅屌絲逆襲！
中坑車仔逆轉拿波裡
咩話？車仔都算係弱隊？唔係啊嘛！
冇錯，當時嘅車仔風評的確係唔夠拿波裡好
點解？當時嘅車仔陣容老化
魔獸34歲、施治30歲、林伯34歲、泰利32歲
成條中軸線由一班中坑組成
狀態不復當年之餘仲要開小會
搞走魔連奴小徒弟保阿斯
係聯賽舉步維艱
首回合客場1比3被拿波裡修理
當時嘅拿波裡一D都唔弱
鹹錫，卡雲尼，拿維斯全部都正值當打
處於拜仁，曼城，維拉裡爾嘅死亡小組裡面
以3勝2平1負嘅戰績脫穎而出
第二回合，臨陣換帥嘅車仔
即使係史丹福橋都冇人睇好
之後嘅故事
迪馬提奧開始佢佛光普照嘅第一站
史丹福橋驚天大逆轉
先係杜奧巴頭球破門
隊長泰利挺身而出
神燈扳平一球
伊雲奴域加時絕殺
就係咁，靠住呢班中坑
車仔上演驚天逆轉
並且一路殺入決賽擊敗如日中天嘅拜仁
成為呢班老男孩最後嘅輝煌
傳奇程度不亞於頭先講過果幾場大逆轉
摩納哥青春風暴擊倒土豪曼城
上賽季除咗巴塞逆轉巴黎嘅好戲之外
仲有16強賽，仲有就係摩納哥逆轉曼城
當時嘅摩納哥都係一班未成名嘅小將組成
真正出名嘅只有法卡奧、魔天奴
其他主力都係一班90後
而曼城經過格迪奧拿嘅打造之後
越趨成熟，首回合係曼城主場5比3擊敗摩納哥
俾年輕嘅摩納哥上了一課
好多人都認為，曼城第二回合會繼續強勢
雙殺對手晉級
但係，第二回合嘅摩納哥
上演青春風暴，令到曼城苦不堪言
梅巴比門前撞射先拔頭籌
法賓奴推射扳平大比分
之後曼城辛尼補射建功
要晉級，摩納哥要再入一波
6分鐘過後，哥拉洛夫冒頂
巴卡約高頭球破門
3比1，依靠客場入球多晉級八強
隨後，呢支摩納哥年輕人
成為各大豪門購買對象
苦主曼城，購入邊鋒貝拿度施華，左閘文迪
車仔將中場大將巴卡約高收歸旗下
大巴黎豪夠梅巴比
陣中嘅薛迪比、林馬、法賓奴
今年夏天都應該留唔住
雖然四強戰不敵老辣嘅祖記
但喺聯賽打破巴黎壟斷
呢支摩納哥創造嘅奇蹟一樣唔惹小
車仔逆轉見證中坑們對命運抗爭
摩納哥嘅逆轉見證未來屬於呢班後生仔
各自表達唔同嘅意義，值得大家回味
摩納哥掀翻銀河戰艦
你冇睇錯，又系摩納哥啊
03/04賽季嘅歐冠絕對係奇蹟嘅一年
曼聯，皇馬，祖記，AC，拜仁全部都入唔到四強
其中呢兩回合對陣同樣令人津津樂道
好多人只記得魔佬當年滑跪奧脫福
但係並冇太多人記得
摩納哥點樣擊敗星光熠熠嘅皇家馬德裡
當時嘅皇馬，首回合可謂眾星閃耀
坐鎮班拿貝，艾雲希古華，施丹，費高，朗拿度
分別建功，但係浪出天際嘅皇馬
被摩納哥偷到兩粒客場入球，為逆轉埋下伏筆
第二回合翻到主場嘅摩納哥
可謂落筆打三更，魯爾嘅入波
令到大比分去到4比1
摩納哥要翻盤必須要入皇馬3波
但係魯爾入波之後，皇馬開始磨洋工啦
打算踢養生足球，節奏越來越慢
相反摩納哥盡地一鋪
上半場補時階段抓住希古華失誤
古利斜射卡斯拿斯右下角扳平比分
下半場，一開始摩連迪斯反戈一擊
力壓防守球員頂入死角
送出助攻嘅就係曼聯球迷好熟悉嘅
左閘艾華
如夢初醒嘅皇馬已經阻擋唔住摩納哥
古利最後腳後跟埋單
淘汰眾星雲集嘅皇馬
之後摩納哥四強繼續淘汰
阿布入主第一年嘅車仔
去到決賽不敵魔連奴嘅波圖，與冠軍失之交臂
而當時嘅主帥
就係宜家法國國家隊主帥迪甘斯
文奴拉斯完成救贖，羅馬逆轉巴塞
由於新鮮滾熱辣，小編就唔回顧啦
但係呢一場絕對係值得載入史冊
而且充滿戲劇性
首回合兩位打入烏龍嘅球員
文奴拉斯同隊長迪羅斯
分別成為第二回合主場翻盤嘅入球功臣
對手係西甲聯賽以不敗戰績
一騎絕塵嘅巴塞隆納
帶住1比4嘅比分，翻到羅馬
有幾多人會相信會有奇蹟發生呢？
然而足球嘅奧秘之處就係未到最後一分鐘
都唔知到邊個係贏家
而呢一場比賽就證明咗呢一點
上一場入波功臣碧基送點
入烏龍嘅迪羅斯頂住壓力罰入點球
頂入絕殺入波嘅文奴拉斯
賽後喜極而泣
證明係入波前嘅一刻佢嘅壓力有幾大
狼王託迪嘅詭異一笑
真係奧斯卡大片嘅劇本都寫唔出...
超級拉科，屠殺衛冕冠軍AC
14年前，拉科絕對係西甲嘅勁旅
但喺佢嘅對手AC米蘭係歐洲嘅霸主
因為，就係02/03賽季AC擊敗祖雲奪冠
當時嘅陣容極為均衡，絕對係冠軍大熱門
首回合4比1作客聖西路被橫掃
好多人都認為拉科會到此一遊
之前小編就講過，03/04賽季嘅歐冠
係奇蹟嘅一年，狂人魔連奴一戰封神
摩納哥擊沉銀河戰艦
呢邊拉科決定都要搞下事
翻到主場嘅拉科勢不可擋
來復槍彭迪安尼折射攻破迪達大門
隨後拉科隊魂華拿朗頭球破門
路基單刀再入一波
最後替補上場嘅費蘭再入一波
最後大比分5比4擊敗AC米蘭
殺入歐冠四強
呢場波，搵唔到動圖資源
大家不妨睇下呢個視頻
米蘭為成為逆轉背景板踏出堅實嘅一步
因為一年後，伊斯坦堡奇蹟發生
苦主又系AC米蘭...
逆轉常有，以弱勝強常有
但係以弱勝強嘅大翻盤就不常有啦
一回合制比賽有好多不穩定因素
所以會造就好多爆冷嘅賽果
但係兩回合就唔同啦
球員會適應，主帥會調度
所以弱勢一方想取勝難度會俾一場定勝負難
所以，點解英格蘭足總杯會係爆冷溫床
因為一路到決賽都係一回合制
諾定鹹森林做低阿仙奴就好最好嘅證明
而兩回合制，大比分落後
弱隊一方無論心理同生理都會有一定影響
好多球員都會帶住負擔比賽
然而能夠放手一搏嘅真係唔多
成就奇蹟必須有幾要素
第一，弱勢一方超常發揮（參考拉科，羅馬）
第二，強勢一方太浪（參考皇馬，曼城）
第三，對勝利的欲望達到頂點（車仔老男孩最後嘅能量）
所以奇蹟不常有，既然發生了
就好好享受足球帶俾我哋嘅快感吧
最後插播一條趣聞
毒奶一下利物浦