原標題：寵妻達人！張智霖袁詠儀逛街買包 無視友人拖手牽甜到膩
2016年1月16日訊，香港，張智霖和袁詠儀（靚靚）結婚十四年，連囝囝張慕童（魔童）早前也九歲了，不過相處至今依然sweet到漏！
近日張智霖雖然忙於四出宣傳電影版《十月初五的月光》，以及下年一月在廣州舉行的個唱，但不用開工的時候，他仍會跟老婆靚靚儼如糖黐豆。如日前，張智霖相約公司老闆蕭定一到中環午膳，慶祝《十月初五》在中港澳大收逾五千萬人仔票房，亦帶靚靚一齊，更毫無避忌十指緊扣拖到實。
冷落老闆
電影版《十月初五的月光》於中、港、澳上映後大收旺場，至今合計有逾五千萬人民幣票房，日前午飯時間，張智霖便偕老婆袁詠儀，相約電影公司老闆蕭定一於中環置地食飯慶祝。
當日約下午一時半，三人用膳完畢後，戴黑超的張智霖便與老婆一支箭離開餐廳，只見阿一馬上尾隨二人。由於其時商場人流甚多，張智霖跟靚靚並肩走了一段路後，便自動波拖實老婆手，即使阿一跟靚靚邊行邊聊天，張智霖亦似乎沒有鬆開老婆手的意思。
步出置地後，阿一即由司機接載離去，而張智霖兩公婆則一直步往雪廠街，返到停泊在那裡等候他們的七人車處。整頓了一會，靚靚便從車廂拿出其Hermes手袋，跟張智霖揮手道別，獨個兒向都爹利街方向走去。行至馬路處，靚靚剛巧遇見一名手挽Hermes紙袋的女性朋友，只見二人打了個招呼後，該名女友人便不停指靚靚的手袋交談，如是者二人站在馬路邊吹了五分鐘水才離開，靚靚便急步往都爹利街一幢商業大廈去。
送袋送樓
查實，當日靚靚與女友人之所以對那個Hermes手袋話題多多，只因那個手袋為Hermes 限量Flag皮革拼帆布的Birkin袋，價值十多萬元！而靚靚所用的那個深藍色帆布，更是極為罕有版！
老婆出名鍾情Hermes，作為老公的張智霖便曾笑稱：（每次到當地旅行）我老婆好似朝聖，每日都要先去Hermes。
把口雖如是說，但實情張智霖近年自豬籠入水、晉升為億萬富豪後，對於送禮物給靚靚，幾乎是沒有上限可言。除了動輒十萬元的Hermes任她買個夠外，去年九月，張智霖更以自己和靚靚各持一半股份的「二豬有限公司」（因二人生肖皆為豬年）名義，斥資一千一百多萬，一炮過買入銅鑼灣希雲街曦巒單位。愛屋及烏，至今年五月，張智霖更為靚靚的家人，以她的名義購入北角健威花園六百多萬的單位。