咪西咪西唱滑稽

　　文 / 鄭文安

　　有一首上海話唱個童謠：鄉下人，到上海，上海閒話講勿來，咪西咪西炒鹹菜。

　　會唱個人交關，小人大人儕會。不過，迭個歌詞已經走樣，真正原版現在曉得個人勿多。因此，能解釋意思個人也勿多。我曾經聽到過迭能個解釋：「上海人看勿起鄉下人，講迭班鄉下人只好吃吃鹹菜。」搭原來個意思相差得懸天八隻腳了。

　　迭只兒歌產生於上世紀六十年代後期，原創作者已無從考證，最初流行時歌詞是：

　　鄉下人，到上海，上海閒話講勿來，咪西咪西唱滑稽。

　　埃個辰光，上海人對短期來滬個外地人儕稱謂「鄉下人」，而到外地去，哪怕是較近個江浙一帶，儕稱謂「到鄉下去」。上世紀六十年代後期，勿少外地人活動於上海街市，因語言交流障礙，常常發生無謂個爭執、誤會。迭只歌謠就應運而生。意思是「鄉下人」講個閒話人家儕聽勿懂。上海人對聽勿懂或者勿認可個閒話，會講：「滑稽啦？」因為簡單順口，童心好玩，兒童個傳唱對童謠個流行起了老大作用。有一日下半日，勒一家石庫門個天井裡，有幾個小囡勒拉唱「鄉下人，到上海，上海閒話講勿來，咪西咪西唱滑稽。」正好有一位老太太坐勒天井裡做針線生活，一來年邁耳背，二來專心於針線，所以拿兒歌聽錯了音，隨口搭小囡搭搭訕頭：「啊，咪西咪西炒鹹菜？」引起了兒童們一陣鬨笑：「哈哈，咪西咪西炒鹹菜！」兒童們反覆唱「新版」歌詞，邊唱邊朝外走。啥人也嘸沒料到搿三五個小囡唱個新版歌詞傳撥了伊拉周圍個小朋友，後來竟傳遍了上海，而且原版倒反而撥伊淹沒，慢慢叫撥人遺忘了。

　　人家要問：「儂哪能曉得得介詳細？」勿瞞儂講，故事發生個當時，我正勒天井裡汏衣裳，故事個主人公——老太太就是敝人個先慈，故事發生地點是成都北路771弄21號。迭條弄堂勿大，只有七、八家門牌號，就是七、八幢石庫門。阿拉迭幢住著六戶人家，天井是公用個，天井裡常有小囡白相。當時弄堂裡個鄰裡關係搭現在勿一樣，張家有幾個人，李家有幾個人，互相儕了解得一清二楚。先母是舊式家庭婦女，專營家務。那時已有第三代，我家祖籍浙江，稱祖母為「娘娘」，全弄堂個小囡儕跟著叫「娘娘」。鄰居大人勿勒家中時，家母也常帶著照看伊拉個小囡，迭班小囡對家母除了尊老愛幼個禮儀外，開開玩笑，講句笑話也是常有個。現在家母已歸天多年，兒童們大多已志在四方了，埃條弄堂勒建築成都路南北高架時拆脫了，弄堂已無蹤影。迭首兒歌個變遷更是很少有人能講得清楚。事體實在微勿足道，但是留作記錄，或者會派得著用場。