最近睇到一單新聞，話有商家推出一種「奇葩月餅」——酸菜月餅。
恕小弟孤陋寡聞，酸菜魚就聽得多，「酸菜月餅」都系第一次聽。小弟唔知呢種月餅系邊位大師嘅「創意」，但覺得佢系喺度阿茂整餅——冇嗰樣整嗰樣。
講到月餅，唔怕俾人話「黃婆賣瓜」，小弟認為最好食嘅始終都系我哋嘅廣式月餅。
廣式月餅嘅特點系皮薄餡靚，其中「餡靚」寧舍緊要。呢個「靚」，講嘅系食材之間嘅巧妙搭配，產生味道「互動」嘅效果，比如，大家最熟悉嘅蛋黃蓮蓉月，點解食起嚟甜得嚟又鹹鹹地，鹹得嚟又甜甜地呢？因為佢將蓮蓉同鹹蛋結合，利用蓮蓉嘅超甜、鹹蛋嘅超鹹，等佢哋互減甜鹹、中和肥膩，咁樣就產生咗鹹甜適中、肥而不膩嘅第三種美味出嚟。
講番酸菜，佢雖然系醃製過嘅「舊菜」，但特點系要「熱食」，比如佢搭配其他食材就可以做成酸菜魚、酸菜牛肉、酸菜面等，佢喺當中起到吊味嘅作用。但如果用酸菜做月餅呢，咁就有啲難為佢啦，因為月餅屬於糕點類嘅「冷食」，作為「熱食」嘅酸菜又點樣搭配成餡料呢？就算夾硬做成月餅餡料，味道酸眯眯，又邊有月餅嗰種獨有嘅香甜味道呢？
傳統食物通常有佢特定嘅食材，唔應該隨便顛覆性改變，如果酸菜都可以做月餅，咁可唔可以做個蛋黃蓮蓉魚呢？