2020-12-22 14:52 來源：澎湃新聞·澎湃號·湃客
來源：新民晚報
作者：胡展奮
滬語改寫：黃燕瓊
審核：丁迪蒙
水是搿個世界浪向至柔又至強個物質，人類從水裡向誕生，所以我勿怕帶勒孫囡劃大水。
窗門外頭剛好勒「發大水」。屋裡向個小孫囡團團個《小豬佩奇》也播放得鬧猛：「阿拉勒泥坑裡向跳來跳去，跳來跳去，跳呀、跳呀、跳！」因此而忽發奇想，「大水」難得，帶牢孫囡劃劃大水去哪能？生活忒庸常了，還勿如來眼驚喜。
果然，聽到我個主意，團團開心得勿敢相信，一口氣叫了十多聲個「爺爺」表示響應，平常辰光，伊就歡喜踏水塘，因為伊歡喜，屋裡向還特為幫伊買了雙小套鞋，今朝可以大展宏圖了。
乃麼，問題馬上就來了，搿雙小套鞋個筒忒短了，還沒到大水裡向去就要撥灌滿個，夾漿夾水個邪氣難過，本來想就「放養一下」，去經風雨見世面個，著勒套鞋劃大水勿是隔靴搔癢麼？為了有切實體會，我乾脆讓伊赤腳，換了雙硬底個塑料拖鞋，直接到水裡向去踏。
鄰舍隔壁看見了儕大驚小怪：哦喲，小囡劃大水啊？！儂做爺爺個發神經啦？！我笑笑勿答。心裡想，小囡將來會得少了搿段珍貴個回憶。劃大水怕點啥？生活是否精彩、就在於伊個多樣性。整天搿個勿好碰，伊個勿好看個小囡，拾張樹葉子麼有細菌，吃口冷水也勿來三個，長大了老有可能就是個沒用場個一個廢人。
再講，劃大水勒阿拉老家也是有傳統個，團團伊拉爸爸三歲辰光從幼兒園迴轉來，剛好「發大水」，伊拉姆媽就帶牢伊去劃大水」，伊種開心搭仔興奮，伊講過了快三十年了，回想起來仍舊溫馨，像煞就勒昨日仔一樣。
可能有人會得講，「大水」裡向有害物質邪氣多。搿個我也曉得個。但難板一趟，有啥關係呢。想當年，大人儕嚇颱風，阿拉卻盼颱風，颱風來了就落大雨了呀，大雨來了末就有大水了呀，小巴辣子就好開會了啦！一道白相個小朋友常莊是赤勒腳衝進雨頭裡，開心啊，大人勒邊浪向叫啥根本就聽見當作沒聽見，好瘋一趟，搿日天就沒白過，弄堂裡向個花壇裡、淘米池裡到處儕是勒大雨裡瘋白相個小囡，有年我五歲，跟牢仔大小囡勒康定路劃大水，深深淺淺一路劃到延平路牛奶棚附近，大小囡拿我忘記脫了，眼睛一眨，我看勿見伊拉了，我就亂轉亂尋，忘記脫哪能介來個了，開始還勿曉得嚇，搭仔幾個陌生個小囡一道白相水，後首來陌生小囡也儕迴轉去了，只剩下來我一家頭，乃我開始嚇了，拼命個喊，沒人睬，天慢慢叫暗下去了，我迷路唻，只看見無數陌生個大人從我身邊匆匆走過，我叫伊拉阿姨或者爺叔，伊拉只不過是奇怪個看看我，勿曉得我要做啥，就儕從我面前走過去了，我一急就放開胡嚨亂哭八哭，是急哭，基本浪是聲嘶力竭、拼命了，乃麼大人馬上就圍攏過來，問長問短，大致是「小朋友，啥地方來個啊？」一類，我只有五歲，只會得講「我要回去」，根本就講勿清爽屋裡向勒啥個地方，屋裡向有點啥人，啥個路，幾號？儕勿曉得。
天色暗黜黜，我記得有個「大人」講，拿伊送到派出所去伐，派出所會得解決個。乃麼再拿我送到了「餘姚路派出所」，其實，餘姚路離開我住個康定路老近個，只隔一條馬路，但是因為我講勿清爽住勒啥個地方，派出所也沒辦法，勿曉得朝啥地方送，情急之中，有人問，㑚爸爸叫啥？搿一問，我福至心靈，張口就回答某某某。
爸爸個名字哪能寫，我當然勿曉得，但根據搿三隻音，派出所根據戶口登記邪氣快個就尋著了我個屋裡向。
5歲劃大水，讓我一輩子儕明白了一個道理，1、哭是最強大個；2、記牢一個名字有好處。所以，我勿怕帶牢仔孫囡劃大水。水乃是世間至柔又至強個物質，人類從水裡向誕生，人難道勿應該從小就親水嘛；其次，蹚水塘個妙曼難以盡言，當溫涼個大水剛剛漫過腳面個辰光，就好像是小魚輕輕叫個勒啄儂個腳板頭一樣，有講勿出個愜意。然後，儂加快速度，乃麼搿個水流就可以衝擊腳踝，慢慢叫再衝擊黃魚肚皮，癢嘻嘻，也瀴篤篤個，越來越深，越來越瀴了，我相信小孫囡對伊一輩子儕會得有印象個，會得講，我幾歲個辰光，阿拉爺爺帶我勒徐家匯附近「劃大水」個，真是刺激，㑚有搿個記憶伐？
劃大水還有一種「放開來別相」個快感。浩淼個積水改變了所有街道個路況，勿管是踏腳踏車還是走路，因為撥搿個大水擋勒海，過勿過去了，交關人只好放下自家，但也是乘機放縱自家，儕到水裡向來了，做趟自由人，笑嘻嘻個划起大水來，乘機「冒野」，皮鞋當套鞋，T恤當泳衣，就讓大水拿渾身濺得精精溼，看伊拉個表情、是個個心花怒放個。
有辰光，阿拉撥文明束縛得忒緊忒長辰光了，也撥庸眾裹挾得忒緊忒久了，種種「規矩」，種種「修養」，啥個「笑不露齒，行不露脛」，啥個「文質彬彬，然後君子」，真箇是土壤一樣活得又吃力、又戇、又板得勿得了，今朝就拿一切儕撕脫，有欲縱慾，有情縱情，恣肆汪洋，豈不快哉！
作者：胡展奮
朗讀者：黃燕瓊
原標題：《劃大水，開心唻》
閱讀原文
關鍵詞 >> 湃客
特別聲明
本文為澎湃號作者或機構在澎湃新聞上傳並發布，僅代表該作者或機構觀點，不代表澎湃新聞的觀點或立場，澎湃新聞僅提供信息發布平臺。申請澎湃號請用電腦訪問http://renzheng.thepaper.cn。