作者：朱海洪
滬語改寫：邊秦翌
滬語講述：湯偉民
推薦：丁迪蒙
民以食為天！
的確，老百姓儕邪氣看重吃到嘴巴裡向去個物事，搿歇個空氣居然有了霧霾，就特別念想小辰光埃種簡簡單單個食品。
勒勒「坤範」邊浪個小吃攤頭，我曾經吃過5分洋鈿一盤子個重油炒麵。
小辰光，差勿多每日天個早飯儕是泡飯。就是隔夜飯用開水泡泡，再弄眼隔夜菜，像油煎帶魚、黃魚鯗咾啥；假使是冬天介，就拿吊勒窗子外頭個鰻鯗扳一塊下來，哎呦，過起泡飯來鮮得勿得了。萬一嘸沒剩菜，也是便當來西個，切一眼海蜇皮，澆眼醬麻油；或者皮蛋拌豆腐；再簡單點，弄塊乳腐，來一眼醬瓜、蘿蔔乾咾啥，儕可以個。
帶魚、黃魚、鰻鯗、海蜇皮，搿眼物事擺到今朝個臺子浪向，稱得上是「高、大、上」，但是勒勒我個小辰光，只能算是家常菜，嘸沒啥個稀奇個。
泡飯爽口是蠻爽口個，吃多了也想調調口味勒呀。難難板板袋袋裡有了眼「壓歲鈿」，嘴巴就要饞了，眼睛就去瞄馬路對過個路邊攤。
走進攤棚，迎面碰著了阿拉鄰居、樓浪向個王家大伯伯：「哦喲！稀客呀，來、來，來，我搭儂炒盆面」。我一本三正經個坐了下來。
大伯伯最最拿手個就是炒麵。只看到灶頭浪個火邪氣烊，照得伊面孔紅彤彤個，兩隻手「嗆-嗆-嗆-嗆」個上下翻炒。過脫一歇歇，一盆金黃色個重油炒麵就端上來了。
濃油赤醬個麵條滴溜滾圓，比起搿歇店家裡個細面神氣交關。不粘不坨咬勁足，幾根小菠菜碧綠生青，還澆了眼花生醬，一拌一吃，香味道直衝鼻頭，搿歇講起來，馬上就想到伊個味道了。
必過，街頭點心再哪能好吃，總歸比勿過自家屋裡燒個美食呀。
面拖黃魚是阿拉屋裡個頭牌菜。
1956年，爸爸「支內」去了河南洛陽。每年回上海探親，姆媽儕要做搿道面拖黃魚來為爸爸接風。
姆媽到山海關路小菜場去買大黃魚，汏清爽之後切塊，拿只青花瓷碗，裡向擺一點點鹽搭仔味精，再倒眼黃酒，要拿魚塊醃脫一歇。另外還要準備一隻青花瓷碗，放一把麵粉，加一塊鮮酵母，搿是一種用粉紅顏色個紙頭包成扁方型個發酵粉，4分洋鈿一塊；再加一眼水調一調，麵粉搭仔發酵粉儕漾開來了；打只雞蛋黃，撒眼蔥花，就成了麵糊，等脫一歇就要派用場了。魚塊擺到麵糊裡向，拖一拖，四周儕滾了麵糊，就可以油炸了。
一般是勒勒門口個過道搿搭炸魚。等到煤餅火頭邪氣烊個辰光，就起油鑊子。搿種辰光倒油，姆媽比平常裡倒得大方多了，油燒到七、八分熱，伊就用筷子挾起魚塊，勒勒麵糊裡向拖勻，「刺啦、刺啦」個下到鑊子裡，翻上翻下，一直炸到金黃焦脆。
四層閣王家大伯伯個老婆正好下樓：「魚香唻！阿是海洪爸爸回來了？」
「是個呀，是個呀！」姆媽興衝衝個挾了一塊魚塞到伊個嘴巴裡。
「乖乖哩個咚！好吃，好吃。」大媽媽一面吃一面顛仔小腳走下樓去。
房間裡個收音機開勒海，搿是爸爸買個，「紅燈」牌，107塊，老價鈿了。收音機擺勒老式個夜壺箱高頭，夜壺箱就是床頭櫃啦。阿拉屋裡個夜壺箱是從鄉下頭帶出來個，蟠龍雕花，古色古香。老式個夜壺箱浪向擺臺收音機，倒是蠻特別個，傳統裡向透出眼時尚個氣息。
爸爸歡喜聽京劇，特別歡喜「四大鬚生」裡向個楊寶森。聽到楊派個「我本是臥龍崗散淡個人……」伊就會得閉勒眼睛，跟牢仔哼發哼發。伊還特別歡喜聽姚慕雙、周柏春個滑稽戲。姚、周兩兄弟是寧波人，鄉音鄉情邪氣親切。
我拿煎好個面拖黃魚端到房間裡向，爸爸正好勒勒聽《寧波音樂家》：
「來發，棉紗線掇來…」
「勿掇…」
「來發勿掇沙發、勿掇棉紗線，來發，懶惰！」
「來發勿懶惰，來發來發痧。」
伊聽得笑出來了。
面拖黃魚擺上臺子，屋裡小囡儕開心得勿得了，爸爸也眉開眼笑。我快點乘機挾一塊魚，先吃起來。咬開金黃色個外殼，一股熱氣衝出來，嫩白無骨個魚肉、爽滑香脆。爸爸拿出山西汾酒倒上一小杯。
汾酒助餐，魚香更濃。一家門坐勒一道，歡聲笑語，其樂融融。
往期回顧：
故裡春秋（二十六）
故裡春秋（二十五）
故裡春秋（二十四）
故裡春秋（二十三）
故裡春秋（二十二）
故裡春秋（二十一）
故裡春秋（二十）
故裡春秋（十九）
故裡春秋（十八）
故裡春秋（十七）
故裡春秋（十六）
故裡春秋（十五）
故裡春秋（十四）
故裡春秋（十三）
故裡春秋（十二）
故裡春秋（十一）
故裡春秋（十）
故裡春秋（九）
故裡春秋（八）
故裡春秋（七）
故裡春秋（六）
故裡春秋（五）
故裡春秋（四）
故裡春秋（三）
故裡春秋（二）
故裡春秋（一）
圖：網絡 / 編輯：渺渺