作者：朱海洪
滬語改寫：邊秦翌
滬語講述：劉時醫
醫生搭仔畫家勒勒迭個老虎灶茶館裡，照樣品茶論道。從唐代陸羽個《茶經》聊到宋朝陸遊個「晴窗細乳戲分茶」；從古法藥用個煎茶漫談到唐代以後清香回甘個點茶。茶湯鮮香，翠碧晶瑩，澆透了困頓文人個胸中塊壘，以茶遣懷，宣洩沉鬱，抱樸守真，物我兩忘。談古論今中，泉湧個思緒氤氳成時代個煙雨朦朧，穿村渡水而來，就算是勒勒迭個簡陋個老虎灶茶館裡向，啥人講茶清香，嘸沒一眼千年古韻個味道呢？
謝之光搭徐錦亞聊得開心，倒是拿張昌楣個「野狐禪」摜了旁邊了。
有一日，張昌楣講起了《徐文長》，乃末讓謝之光勿得勿刮目相看了。
蘇州評彈裡向有隻曲目叫做「開篇」，就是演唱故事前先彈唱個短篇唱詞，作為正書個引子。張昌楣花樣翻新，撥《徐文長》拿過來當作開篇，擺勒《三國》前頭來娛樂聽眾。一看今朝講到好朋友個老祖宗了，謝之光精神一振，洗耳恭聽。
徐文長就是明代個大畫家徐渭，浙江紹興人，號青藤居士，也是「青藤畫派」個鼻祖，中國「潑墨大寫意畫」創始人。徐渭個畫不重形似求神似，山水、人物、花鳥、竹石無所勿工，尤以花卉最最出色。伊開創個一代畫風，對後世畫壇個八大山人、石濤、揚州八怪咾啥影響儕邪氣大。近代有得兩位畫家特別崇拜伊。一位是清朝個鄭板橋，曾經刻印自稱：「青藤門下牛馬走」。還有一位是講：「恨勿得生勒三百年前為青藤磨墨理紙」個齊白石。當然咾，謝之光也是邪氣歡喜青藤個。
徐渭迭個人是個奇才，但是命運多舛，民間有伊勿少刁鑽幽默詼諧個故事。張昌楣拿伊個故事做開篇，活躍氣氛，聽得茶客捧牢仔肚皮儕笑勿動了。
謝之光聽了一歇，突然問徐錦亞：「儂曉得張昌楣為啥搿能介歡喜徐文長伐？」
「勿曉得！儂講為啥？」徐錦亞有點奇怪。
「儂嘸沒看出來伊身浪向有眼徐文長個影子啊？」
「哦…儕是瘋子。」徐錦亞恍悟道。
徐渭是天才，也是瘋子！
徐渭從小聰慧，六歲讀書，九歲就能寫文章了。十多歲個辰光，仿楊雄個《解嘲》作《釋毀》，轟動全城，當地個紳士稱伊為神童。但是徐渭仕途邪氣坎坷，17歲參加「童子試」，嘸沒中；廿歲考秀才，又嘸沒中。伊有眼勿服氣，就撥浙江提學副使寫了封信，要求複試。搿能介再撥錄取為山陰秀才。勿曉得啥個原因，以後8趟鄉試，徐渭屢戰屢敗，一直考到41歲，還是嘸沒半點功名。自視甚高個徐渭快要撥逼瘋了。37歲個辰光伊投奔浙江巡按監察御史胡宗憲，當了一名幕僚。後首來，胡宗憲因事被捕下獄，幕府解散。已經43歲個徐渭因為諸事勿順，痛苦得居然發瘋自殺。自殺嘸沒成功，但是「心病」也嘸沒好呀；第二年發生殺妻慘案。伊勒晚年自家寫了《畸譜》，提到殺老婆個事體：「病易，殺張下獄」，迭個「易」就是「癔」個意思，也就是阿拉今朝講個神經病。按照弗洛伊德心理學講法，癔病是一種創傷後應激障礙，最主要個症狀是記憶侵擾導致神經錯亂。
勿曉得張昌楣插花《徐文長》，是勿是一種同病相憐個同氣相求？
徐渭多才多藝，曾經自稱「吾書第一、詩二、文三、畫四」。實際浪，伊個才藝遠遠勿止搿眼，有一門技藝伊自家嘸沒當回事體，就是戲劇。伊個雜劇《四聲猿》勒當時就邪氣有名。明代大戲劇家湯顯祖讀了之後，認為伊是「詞場飛將」。
到了今朝，大家普遍推崇個是徐渭自家評論個「四」。我後首來讀到徐渭生平，最最佩服個倒是伊個軍事才能。嘉靖37年，徐渭為胡宗憲出謀劃策，拿明朝軍隊也解決勿了個海盜徐海、汪直儕解決了。一個舞文弄墨個秀才，居然能運籌帷幄，決勝疆場，看看整個大明皇朝，勒勒文才武略方面可以壓過伊個也只有王陽明了。
懷才不遇又疾病纏身，晚年個徐渭只能靠賣畫度日，成為「數點梅花換米翁」，伊個鬱悶搭仔無奈也只能勒勒自家個詩畫裡向宣洩：
落魄半生已成翁，獨立書齋嘯晚風；
筆底明珠無處賣，隨拋隨擲野藤中。
1593年，72歲個徐渭勒自家破舊個小屋子裡離開人世，身下只有薄薄個一層稻草，茅屋外飄搖著一對千古名聯：
幾間東倒西歪屋
一個南腔北調人
往期回顧：
滬語民謠——抗疫重點要記牢
故裡春秋（十一）
故裡春秋（十）
故裡春秋（九）
故裡春秋（八）
故裡春秋（七）
故裡春秋（六）
故裡春秋（五）
故裡春秋（四）
故裡春秋（三）
故裡春秋（二）
故裡春秋（一）
圖：網絡 / 編輯：渺渺