TVB《萬千星輝頒獎典禮2021》成為熱話，唔少人都對「最佳劇集」、「最佳男女主角」嘅得獎者有異議！尤其係林夏薇獲視後掀網友熱議。而譚俊彥雖然係大熱但首獲視帝仍被指係靠關係！喺頒獎禮「思家大戰」環節更有觀眾直言佢攞獎係「靠爸爸」，場面尷尬！
林夏薇「爆冷」贏大熱鍾嘉欣奪視後
一年一度嘅《萬千星輝頒獎典禮》向來都受到觀眾關注，上年蔡思貝奪視後就被指「唔夠班」，今年鍾嘉欣喺《星空下的仁醫》有多場喊戲，演技大爆發屢獲好評，網友力撐佢攞視後。
但鍾嘉欣專程喺加拿大返港出席頒獎禮仍大熱倒灶，不敵林夏薇，僅獲「馬來西亞最喜愛TVB女主角」。林夏薇「爆冷」奪視後大出網友預料，更質疑佢「係咪課咗金？」
網友對視帝視後賽果不滿！
視帝視後結果令網民十分不滿！繼林夏薇奪視後惹爭議，出爐視帝譚俊彥亦被指係「靠關係」攞獎！喺TVB官方微博下有唔少內地網友留言指視帝視後並非實至名歸！
有網友直言譚俊彥攞視帝完全係「成功靠父幹」，又稱佢喺《換命真相》最後一集喊都喊唔出，演技唔合格。更有網友將佢同「最佳女主角」嘅頒獎嘉賓黃宗澤、吳卓羲比較，表示佢兩個都未拎過視帝，唔明譚俊彥「何德何能」？！
亦有內地網友總結TVB獲獎名單：「秦沛個女、狄龍個仔、林峰堂妹」，暗指部分得獎者係靠家人攞獎，但有人稱姜麗文演技出色，攞獎好正常。
譚俊彥2016年籤約TVB後屢做主角
有網民為林峰「平反」，指佢自己競逐視帝都陪跑n年，點會幫到堂妹攞視後。而譚俊彥就唔同，雖然喺頒獎禮前佢已係視帝大熱，但早年喺內地發展嘅佢2016年先籤約TVB，2018年首部電視劇《天命》播出，佢飾演主角嘉慶帝，譚俊彥成旗下藝人後接演嘅劇集均做主角，喺TVB發展相當順利。
頒獎禮佢爸爸狄龍亦有出席，更擔任「萬千光輝演藝大獎」頒獎嘉賓，地位超然。
頒獎禮「思家大戰」譚俊彥被指攞獎靠爸爸狄龍
頒獎禮「思家大戰」環節中，李思捷提問「觀眾成日誤解藝人攞獎唔係靠實力，係靠乜？」，馮盈盈回答：「籤長約」，成功答中第一位。
之後李思捷再問譚俊彥除咗「靠籤約」仲有靠咩，此時現場觀眾席竟有人大嗌「靠爸爸」，令全場大笑，譚俊彥都窒咗一窒，隨後面色尷尬，無奈回答：「我想講靠關係。」，都答中第三位，不過個mon就寫「高層親戚」。
喺譚俊彥奪獎後，有網友留言指：「係咪靠魷魚遊戲攞視帝？」、「有咩代表作？《魷魚遊戲》？」