大家都知道一班巴士快起上嚟等3分鐘，慢起上嚟等30分鐘。
班次即使寫住7:30am到，仍可以8:00am都唔見人。
所以由你決定搭巴士嘅一刻開始，就好似參加咗一場賭博咁，又或者咁講，正正因為巴士有呢種「不穩定因素」,驟然增添幾分神秘感，更令我哋入迷。
而好多時，我哋行去搭巴士嘅時候，都會遇上一個情況。
就係『見到個巴士站，但又未行到。』
呢一百米嘅距離，望落好近，但非常緊張。因為你好驚，你好驚呢個情況會引伸另一個場面。
就係『你未行到個巴士站，但架巴士已經係你身邊駛過。』
個下真係人生交差點！係咪要即刻追？定要直接放棄？
追，你會驚最後追唔到，俾成條街恥笑；
唔追，你又怕之後要再等半粒鍾先有車，浪費人生嘅時間。
老死阿強話：「呢個追巴士嘅畫面其實就係『暗戀』嘅寫照。」
你去得呢個巴士站因為你知「有機會上到車」，
你鍾意得呢架巴士因為佢標明嘅目的地就係你嘅終點，唔需要兜路，直達咯馬。
目的地同巴士線路非常清晰！你需要做嘅，就係喺巴士停站前到達站口，兼且上車。
睇落容易，但最後上到車嘅寥寥無幾，
因為我哋諗漏咗一個因素－「時機」。
世上75%嘅暗戀唔可以變成相戀都係因為「時機問題」。
去返「兇案現場」，
你好努力咁行去巴士站，甚至會下意識咁向後望，因為你怕架巴士會到，你好想捉緊呢個時刻，怕會錯過呢架巴士。
你都想事事順利，但好衰唔衰，你都未行到，架巴士已經係你身邊飛過。
而你，亦無去追。
明明已經望到個巴士站、明明架巴士有嚟、明明架巴士仲要停埋，開埋門。
但係我哋都係無追。
喺呢19秒16嘅時間裡面，保特都可以跑兩次100米。而你呢，就企咗係度，成碌葛咁。
似乎又係毒男細胞發作，你唔敢追。
只係呆呆地，睇住佢停、睇住佢走，然後後悔，不斷幻想另一個結局，「如果點點點、如果咁咁咁…」
直至，
你連車尾燈都見唔到。
你心入面總係崇拜住一種叫「不要驚動愛情」嘅美學，但你從來唔知所有愛情都必定受過「驚動」。
無被驚動過嘅愛情，嚴格上嚟講並唔係一種愛情，而只係你自己嘅一種「私人感情」。
係架，架巴士駛過自己個陣時，你有好多藉口：
「跑又點呀…都追唔到啦…」
「大街大巷跑…好樣衰啫…我Cool開架嘛…」
「其實…可能地鐵都唔錯嘅..唔一定要搭巴士…係咯..唔一定嘅…」
「追到又點呀…好似勁多人..可能爆滿..我都係上唔車啫..」
自欺欺人、怕無面、安慰自己。
你諗過九千幾句藉口，係冇諗過一句：
「仲望？追啦僕街！」
各位僕街，人生路上，我哋後悔過嘅巴士站已經可以埋滿亞皆老街至太子道西。
最慘嘅係，就算明知追唔到，但係我哋連揮手道別嘅勇氣都無..
與其企係原地喊，不如抬高腳，唔好理其他人嘅目光，為自己跑一鑊。
或者最後你都係追唔到。
但至少，俾架巴士知道你追過。
即使你無緣踏足佢嘅車身，都曾經出現喺佢嘅倒後鏡入面。
起碼，你都到咗自己想去嘅巴士站。
廿九幾年後，你可能會覺得自己當年有啲傻仔，
但至少你傻過，亦傻得無錯。