尋日係2017年嘅第一日,禮貌上都要講句新年快樂嘅,
相信尋晚一眾廣東歌迷都有追#叱吒樂壇頒獎典禮#,
今年嘅主題係"忘我不忘本"
對於賽果唔知你地點睇,總之我就覺得#忘我不忘本#其實係暗題,今年真正嘅主題應該係:
我 最 喜 愛 都 不 是 我 喜 愛 的
點解咁講,先嚟睇睇16年叱吒樂壇頒獎禮完整得獎名單
滑動以下區域查看完整得獎名單
2016年度叱吒樂壇流行榜頒獎典禮
完整得獎名單
叱吒樂壇我最喜愛的組合 Supper Moment
叱吒樂壇我最喜愛的男歌手 吳業坤
叱吒樂壇我最喜愛的女歌手 鄭欣宜
叱吒樂壇我最喜愛的歌曲大獎 鄭欣宜〈女神〉
專業推介叱吒十大 第十位
林奕匡〈愛情小品〉
專業推介叱吒十大 第九位
小塵埃〈卜卜卜〉
專業推介叱吒十大 第八位
容祖兒〈無人知道雙子座〉
專業推介叱吒十大 第七位
方皓玟、RubberBand〈終於好天氣〉
專業推介叱吒十大 第六位
許志安〈非安全地帶〉
專業推介叱吒十大 第五位
吳業坤〈百姓〉
專業推介叱吒十大 第四位
C AllStar〈聲音騷了〉
專業推介叱吒十大 第三位
鄭欣宜〈女神〉
專業推介叱吒十大 第二位
張敬軒〈羅賓〉
叱吒樂壇至尊歌曲大獎 陳奕迅〈四季〉
叱吒樂壇至尊唱片大獎 容祖兒《JPOP》
叱吒樂壇唱作人銅獎 周國賢
叱吒樂壇唱作人銀獎 方皓玟
叱吒樂壇唱作人金獎 林海峰
叱吒樂壇生力軍銅獎 陳明憙
叱吒樂壇生力軍銀獎 張美儀
叱吒樂壇生力軍金獎 鄧小巧
叱吒樂壇填詞人大獎 黃偉文
叱吒樂壇作曲人大獎 Howie@Dear Jane
叱吒樂壇編曲人大獎 馮翰銘
叱吒樂壇監製大獎 Edward Chan
叱吒樂壇組合銅獎 DearJane
叱吒樂壇組合銀獎 Supper Moment
叱吒樂壇組合金獎 C AllStar
叱吒樂壇女歌手銅獎 JW
叱吒樂壇女歌手銀獎 Gin Lee
叱吒樂壇女歌手金獎 容祖兒
叱吒樂壇男歌手銅獎 許廷鏗
叱吒樂壇男歌手銀獎 陳柏宇
叱吒樂壇男歌手金獎 張敬軒
對於一個對電臺對903對叱吒有情結嘅人講嚟,我唔敢講好多人,我就講自己啦,今年嘅叱吒真係令人好失望.成個流程亂到離曬大嫂,好似急急腳趕收工咁.大部分獎頒完之後,都忍唔住O曬嘴表示"唔L係掛,竟然係佢."
以下就揀啲比較具有爭議性嘅探討下:
「叱吒樂壇唱作人金獎 林海峰」
問題就在於,可能大家會以為呢張係網絡cap圖,係嚟緊林海峰棟篤笑嘅宣傳海報.不過林海峰講嘅嘢又真係幾啱嘅.
「叱吒樂壇至尊歌曲大獎 陳奕迅〈四季〉」
其實四季成為至尊歌係無咩問題嘅.雖然聽到嘅時候都O咗下嘴.睇返首歌本身:周國賢嘅曲,小克填嘅詞,編曲同監製都係思歪江 C. Y. Kong.完全無問題啊,所以問題就在於唱嘅人身上.呢首歌俾陳奕迅唱其實同之前無條件嘅情況一樣,「已經唔需要陳奕迅去唱,如果其他歌手唱可能會係一個驚喜.」加上陳奕迅一係唔嚟頒獎禮，一嚟上臺又發臺瘟.正如網友所講：「真係忘詞不忘本,唔係你唱功有問題.係你態度有問題啊歌神.」
「叱吒樂壇女歌手金獎 容祖兒 」
十八年嚟,拎咗11個叱吒女歌手獎項,容祖兒真係巧能蟹(好犀利).容祖兒仲專登著左佢第2次拎女歌手金獎嘅舊衫去拎佢第11次金獎.證明自己「忘我不忘本」,真愛粉一嘢就記得當年係指04年嘅叱吒頒獎禮.
(04年叱吒樂壇頒獎禮)
但其實當時佢著住呢件衫攞嘅係銀獎.而金獎係楊千嬅.另外祖兒亦都收穫當年嘅我最喜愛女歌手獎.然而最諷刺嘅係:
當時祖兒攞銀獎,大家都鄧佢唔抵.
今日攞金獎,個個又覺得佢唔應該係.
「叱吒樂壇我最喜愛的男歌手 吳業坤 」
一代偽毒棋人吳業坤繼續冧莊我最喜愛男歌手,今年見到呢個結果反而平靜咗接受到.可能因為上一年嘅衝擊真係太大,又或者係因為前面嘅獎已經頒到離曬大嫂,所以呢個反而正常返小小.但係講返句公道話,今年坤哥嘅作品其實都可以,而佢本人都極度努力.對比許廷鏗所謂「站著說話不腰疼」嘅堅持,坤哥做過棋都不忘初心,佢都真係幾符合今年主題:#忘我不忘本#.而坤哥曾經係電臺接受採訪嘅時候講過:
「唔係新歌唔好聽,而係大家唔去聽」
佢指嘅新歌係所有廣東歌.的確如果你連聽都無聽就扼殺廣東歌,成日鳩叫#樂壇已死#,咁係咪有啲唔公平呢?
有 歌 唱 邊 個 想 扮 棋
雖然大家都覺得#我最喜愛男歌手#應該係陳廣偉先啱數:
(廣偉真係好中意佢啲同事,真係每次都提住.
唔好講咁多,請問仲請人嗎?)
「我最喜愛的歌曲大獎」
當晚最後兩強分別係:
鄭欣宜〈女神〉同方皓玫〈你是你本身的傳奇〉
其實本來我屬意「你是你本身的傳奇」係至尊歌,當時四季登頂我已經O嘴.之後就一直期待我最喜愛歌曲嘅環節,本來坐定粒六以為傳奇食硬.點知,我又一次跌碎咗副眼鏡.事實證明，「大家」都係中意女神多啲,你是你本身的傳奇最後變咗曲奇碎咗.見到咁嘅結果，還要怎麼去過生活啊？
當晚欣怡亦都收穫#我最喜愛女歌手獎#
算啦,其實欣怡都好努力嘅,亦都係一個孝順女.
每次攞獎都會感謝屋企人.但係我仲係想講
講完,你係咪都覺得
「哇,唔L係掛,我接受唔到咯」
不過當晚最精彩嘅部分我覺得係
「林海峰嘅高牆與雞蛋」
其中隱形歌手vs隱世歌手真係聽到我拍爛手掌,
據聞愛奇藝係無直播到呢個環節,想睇返可以私信後臺.
之所以會對叱吒頒獎禮特別情有獨鍾,係因為呢個係商臺每年一度嘅盛事,當晚商業一、二臺DJ會傾巢而出.為頒獎禮擔任司儀及其他臺上臺下嘅工作.頒獎禮大約頒發三、四十個獎項,除咗「我最喜愛獎項」外,其他獎項則依據歌手派臺歌在叱咤903的播放率決定,被認為是香港樂壇四大頒獎禮中,評選標準透明度較高的一個.
頒獎禮獎項不濫發,而且增加歌手得獎、上臺的難度.而歌手表達得獎感言的時間並無限制.加上DJ精心安排嘅煽情串詞,唔少歌手喺臺上都會真情流露,或者因為感動而忍唔住標眼汁(詳情參考坤哥扯蝦眼鏡起霧).叱吒樂壇頒獎禮亦都係近年香港唯一一個允許歌手唱曬成首得獎歌嘅樂壇頒獎典禮（因為其他頒獎禮只能安排歌手唱半首歌曲）.
但係今年結果一出嚟,即刻被鬧爆.仲被指16叱吒樂壇係最「岸久」嘅一年.甚至有網友表示:
「衰過大臺,做馬黑箱仲要扮曬公正」
見到呢啲說話,真係覺得好心痛.同朋友討論嘅時候,佢就認為:呢個本來就係小圈子遊戲,係大家一直意淫佢.睇到呢句說話,真係瞬間有種難以言表嘅失落感.都係即刻炒返上兩年嘅冷飯慰藉下心靈先得.
以上都係我個人對今年叱吒嘅睇法,唔知今年嘅結果你哋又滿唔滿意呢?
(如果想重溫今年叱吒頒獎禮,請私信後臺hiahiahia)