《無間道》是香港臥底電影的經典，經典到電影自上畫以後，所有臥底都被叫做「無間道」。而第二集，就以角色的前傳做藍本，同大家補充番韓琛成魔之路，黃Sir養虎為患的來龍去脈。
《使徒行者》都系電視界臥底劇的皇牌，估唔到去到第二集，都系鎖定拍角色的前傳故事，睇了個幾星期，不難發現成套劇都充滿《無間道II》陣味，就連人物設定動機性格都好孖生咁。
陳豪要演一個黑社會大佬，沉實又冷靜，殺人唔眨眼，呢樣就同吳鎮宇飾演的倪永孝極似。
倪永孝一角心思細密，正正系做黑社會都要食腦嗰種格，殺人唔使用劍。
倪永孝VS魏德信 為老竇清理門戶
倪永孝在《無間道II》系社團第二代，老竇因為被暗殺，於是要臨時執政，不過就被四大頭馬質疑能力，拒絕交數，結果外表斯文的他，狠下毒手一下子將四大頭馬殺曬，清理門戶，然後正式上任。陳豪飾演的魏德信都系一樣，不過佢系嫌老竇太廢，索性勸退佢自己執政，而且坐正後行事一樣心狠手辣。手段似，角色性格似，就連兩位的演繹方法都似，又系戴個眼鏡以表高智慧，事事深藏不露，再殺更多人都系處之泰然，兩角的立體程度一致，唯一唔同就系把頭髮。
歡喜哥成日笑騎騎，典型笑面虎。同《無間道II》的韓琛同類，不過韓琛經歷完死老婆後性情大變，歡喜哥就仲keep到。
前傳的韓琛，仲好獎門人，但第一集的他，已經不苟言笑。
韓琛VS歡喜哥 老婆被殺泰國搵幫拖
韓琛同歡喜哥最似地方系大家本來都系社團的中堅，原本忠心耿耿，但就系被社團老大質疑，投不信任票，甚至想殺人滅口，然後被逼作反。當日韓琛女人Mary姐（劉嘉玲飾）想同黃Sir合作暗中推韓琛上去，但被倪永孝發現先下手為強，令韓琛要避走泰國然後搵幫手回港。又咁啱，歡喜哥都系處於呢種尷尬情況，本來安於做只馬仔，但魏生要剷除班老油條，於是殺死歡喜哥老婆（陳煒飾），呢下促使歡喜哥要作反，但佢同樣都系去泰國搵人幫手，完完全全系一場「琛」路歷程。
呢個《使徒》版傻強，其實唔扮好過扮。
有一廠黎明之稱的謝東閔，點估到最終系要扮杜汶澤。
傻強都有埋呢下先無敵
至於其他角色，其實都好大同小異，例如苗喬偉飾演的卓sir，同歡喜哥的關係，同黃Sir與韓琛在第二集的相處模式極似，未系對立面，仲有傾有講。而臥底方面，呢樣就沒跟到足，沒話周柏豪系陳永仁，定袁偉豪系劉健明。
不過最離譜系《無間道》的重點搞笑角色傻強（杜汶澤飾），去到《使徒行者2》都有得重現，負責的朋友叫謝東閔，閔大人。事緣佢系歡喜哥最低階的馬仔，當周柏豪話要跟歡喜哥時，就耍佢叫佢跟撻Q先（謝東閔飾），謝生的演繹手法，完全捕捉曬傻強的特質，最鍾意講無謂嘢，當傻強有個「識別臥底論」時，撻Q就有個「社團公關論」，「做黑社會都系公關，要笑！」至於笑唔笑得出，睇大家接受程度。