藝人姚子羚因與模特兒蔡宛珊（Sarika）前夫Raymond拍拖而成為傳媒焦點，雖然Sarika與子羚先後已跟男方分手，二人亦已放下，重回自己的路，而正印Sarika亦不深究甚麼所謂「重疊」時間，不過，似乎仍有人放不低，不時爆相爆聲帶，但傳聞中的「二奶」從沒現身，亦只是所謂的二奶「閨蜜」爆料。
雖然今次有子羚與Raymond「開眼」合照，好似同上次子羚聲稱自己不知情況下而「被合照」的相片很相似，但細看下，兩張相片根本不同時間拍攝的，上次子羚「被合照」的相片是化了妝，而今次的郄是素顏及穿泳衣拍攝，再講，情侶影合照，去泰國又好、美國也好，一般的情侶合照，有何相干？而聲帶中，內容未有「逼分」，只是姚子羚似向二奶埋怨Raymond不夠成熟，子羚更勸Raymond改好重投Sarika身邊，又有何居心？
以下是五段疑似姚子羚的錄音聲帶：
「即係佢咪就係咁囉，如果佢可以成熟啲諗嘢，你老婆就唔會離開你啦。呢句說話我都不下一次同佢講，我話我終於明白，點解你老婆會離開你嘞。」
「當然佢唔會話畀我聽，佢老婆離開佢，係因為佢flirt女啦，中間。佢都係講話Sarika唔開心，因為佢冇時間陪佢，因為佢喺夜場返工，日日做到好夜，等佢返嚟瞓呀。佢就話我邊有時間啫，佢都知我係咁樣工作㗎啦，佢覺得以前冇錢，覺得有時間，好喇！但而家做咗嗰度份工，佢搵到錢喇，但就冇時間囉！」
「佢而家仲覺得，橫掂我老婆都會離開我㗎啦，咁我使乜做好我自己。我心諗佢都特登咁去做放縱自己，但呢樣嘢係你自己去決定啫，如果你真係有心想Sarika返去你身邊，咁點解你唔利用佢離開你呢段時間，好好哋做好自己，證明畀你老婆知，你真係愛佢，所以為咗你，我做好我自己，希望你返嚟我身邊，而唔係繼續flirt女、媾女、食女。」
「最終我拆穿咗佢，話我有朋友識你老婆，同埋有朋友喺IG見到你老婆，影到你喎。佢冇得唔認，因為之前我問咗佢好多次，我話我再問多你一次，你係咪去咗見你老婆？佢死口唔認嘅。」
「唔係呀，我哋返緊去佢嗰度時，佢突然之間停車，就話覺得佢好似見到你喺佢屋企樓下等。我話係咩，我唔見喎，我覺得佢呢個舉動，係想扮曬嘢，等我知難而退，咁我就唔會上佢嗰度，我當然唔會啦，我梗係特登上佢度。」
對此，東網記者聯絡Sarika，她再次重申謂：「其實我同Raymond於2017年年初分居，之後Elaine（姚子羚）或者其他異性幾時出現，有沒有重疊這些，我不清楚，亦不想深究。」問到覺得是誰繼續不斷放料時，她謂：「不知，不想猜測。（是不是覺得有人放不下？）不想猜測，已經不關我事！」再問她覺得子羚是否受害者時，Sarika坦言：「個個都是受害者，因為我同Elaine是圈中人，還有影響Raymond同所有牽涉事件的人，希望事件快點完結！」