白話廣州
如果你喺街度，大聲嗌一聲「嘉欣」，可能會有成群靚女響應喔！原來，據公安部門統計，廣東人最常用嘅名中，「嘉欣」排第一。呢個名咁受大家歡迎，除咗令人聯想到某個大明星，又或者聯想到「加人工」之外，到底仲有咩原因呢？
之前，有幾個朋友幫仔女起名，佢哋共同嘅要求，一系意頭好，二喺叫得響，尤其喺用廣州話讀得響亮。嘉、欣兩個字，都符合要求。喺份TOP100排行榜上，除咗嘉欣，仲有家欣、嘉慧、嘉麗、嘉文、嘉豪、嘉琪、凱欣、穎欣、詠欣等，涉及兩個字或佢嘅同音字嘅，至少佔咗一兩成，可見廣東人對呢兩個字嘅歡喜。據說，唔同地方嘅人起名中意嘅字，有明顯嘅唔同，譬如話江蘇人中意用「英」字，陝西人中意用「劍」，上海人中意用「寶」。有啲名，一聽就知道唔系廣東人，原因就系佢用白話讀有唔同嘅諧音，而且唔夠響亮。
話時話，廣東人嘅流行名亦一樣會跟住時代而變，避免重名成咗第三種要求。譬如話以前流行嘅偉強、國雄，家陣啲細路已經好少用。相比之下，「睿」、「贇」之類以前少用嘅字，如今就幾流行。不過計我話，幫細路起名仲系少啲用溜愣嘅字，費事到時俾佢增添不必要嘅麻煩，譬如朋友甚至老師唔識讀，或者太繁瑣，籤個名要俾人哋用多幾十秒。
聞歌 媒體人
本文來源：信息時報 責任編輯： 王曉易_NE0011