朱晨麗（朱朱）近日憑TVB劇《特技人》中精湛的演出而人氣急升，但人紅自然是非多，近日被揭與一名億萬劉姓富商有段情因而令她置富，由當日從內地來港租住一百呎劏房，令她至今在港已坐擁千萬物業和開設高級畫廊。
好友開腔澄清
身為朱朱好友兼畫廊拍檔的Vivian Wong不甘好友被「屈」，挺身開腔為好友澄清傳聞，Vivian表示：「我同佢（朱朱）識咗好耐，佢同劉先生嘅新聞系N年前嘅事。佢有今日嘅成績點會同佢有關？近年佢事業上好拼搏先有今日。」
贊有上進心
Vivian透露相當了解朱朱為人，兩人同是相識多年的教友，指朱朱當年十四歲隻身來港生活，唔覺得她租住劏房有甚麼問題：「之後佢好叻考到獎學金去美國讀書深造，再返香港參加香港小姐。佢喺香港買樓都有問我意見，佢都只系畀到首期要慢慢供，個銀行按揭都系我介紹畀佢、仲有裝修師傅，佢好慳儉。我仲同佢講慢慢供唔使擔心，喺香港一定要有物業，男人系靠唔住。我真系一個見證人，睇住佢全部成績都系靠自己打拼出嚟，我都有同自己嘅小朋友講，呢種精神要好好向佢學習。」
以工作為先
至於朱朱現階段的感情狀況，Vivian表示她沒有拍拖：「我知佢依家有人追，不過佢事業心好重，知道唔能夠靠人，我叫佢咪靠男人，要信自己先至明智，所以佢系一個乜都會以工作為先嘅女仔。」
朱晨麗（朱朱）自小習舞，因有舞蹈底子而對演藝之路更加有利。入行前，朱朱曾獲上海一個著名芭蕾舞舞蹈團取錄，後開始跳舞生涯，來港後亦獲得香港芭蕾舞團賞識，成為一名專業舞者。她於2011年來港參選港姐並當選冠軍，比賽前被封為「翻版陳法拉」而成為大熱，入行後亦成為無綫力捧花旦之一，當年代替受傷的陳法拉接拍重頭劇《名媛望族》，擔任第三女主角，同年接拍重頭劇《衝上雲霄II》以及劇集《情逆三世緣》，往後更有不少演出機會。
絕不錫身
雖然貴為港姐冠軍兼備受力捧，但朱朱並沒有因此而「吊高嚟賣」，拍劇絕不錫身、落力演出。早前她有份參演《棟仁的時光》，於劇內飾演一名鋼管舞女郎，她為此接受個多月特訓，更因練舞而搞到周身傷。出席臺慶時，朱朱亦毫不吝嗇其傲人身材，經常性感現身派福利。在最近的熱播劇《特技人》中，她在沙灘曬線打排球的一幕更是睇到一班觀眾成地鼻血！
緋聞甚囂塵上
至於感情生活，朱朱拍攝《超時空男臣》時被傳與何廣沛戲假情真，二人更曾被拍得密會撐檯腳。雖然二人否認拍拖，但出席活動時的甜蜜互動令這段緋聞甚囂塵上。其後朱朱在2017年無綫萬千星輝頒獎典禮上，榮獲「最佳女配角」獎，攞獎後與何廣沛擁抱慶祝。