滬語改寫、誦讀：邊秦翌
指導：丁迪蒙
年初五個大清老早，我勒勒自家屋裡頂樓個袖珍小竹林裡向，勒末生頭看到一隻鳥，伊篤悠悠個趴勒竹頭個中上部。看到我貼近玻璃門看伊，一眼眼也嘸沒馬上要飛了跑個意思，還盯牢仔我看發看發。
平常辰光，也常莊有得類似個小過客勒搿搭立一歇。但是，每趟只要我一靠近，伊拉老裡八早就慌裡慌張個逃走了。而伊，為啥搭我「相看兩勿厭」呢？我覺著邪氣意外。細細叫看了看，再發現伊個身體下頭有隻小小個窼，噢！曉得了，伊是勒勒孵小鳥啊！
搿是只灰褐顏色個鳥。頭頸浪向有一圈黑顏色個羽毛，另外還有白顏色個斑斑點點，點綴勒高頭。搿是只啥個鳥啊？我對貓狗之類向來淡漠，但是，對搿只鳥倒是來了興致。對牢仔鳥拍了好幾張照片放勒朋友圈裡，一歇歇就有了反饋：原來，搿是一隻珠頸斑鳩，也可以叫做珍珠斑鳩！勿去管伊了，反正就是斑鳩！既然伊選擇到我屋裡來做「舍姆」，葛麼我就擔當起「月嫂」個職責伐。
從年初五開始，由於NCP，我關勒屋裡向已經足足半個多號頭了。每日天24鐘頭儕勒勒屋裡向，除脫仔必要個案頭工作以外，去望望伊、去搭仔伊講眼「童話」或者「神話」，已經成為我生活個一部分了。
早浪向，我總歸勒七、八點鐘到陽光房，第一樁事體，就是向伊問好。看到伊懶撲撲個趴了伊面，就邪氣小心個打聲招呼，「哈羅！寶貝！」隨後再去為我種個花花草草澆水鬆土。一圈事體儕做好，去寫作之前，再去看看鳥。我勿曉得鳥是勿是會得笑，而我，卻是對伊充滿了笑意。
下半日三點鐘到五點鐘，是我工作之餘個休閒辰光。坐勒勒陽光房裡向，沏杯清茶，聽聽音樂，我又去跟斑鳩搭訕了：「儂先生哪能勿來望望儂啊？」「儂覺著孤單伐？」 伊朝牢仔我眨眨眼睛，勿響。大概，伊嫌避我問得忒過分了？
斑鳩並勿是完全勿動個，伊常莊會得調調動作，換換姿態。我觀察下來，孵了十來分鐘之後，伊就要挪動挪動身體，明明是頭對牢我個，一轉身，就只看見到伊個尾巴了。再過一歇，伊拿伊個側面撥儂看。有辰光，伊還會得飛出來，立勒竹頭浪向，伸伸頭頸啊，甩甩尾巴啊，拍拍翅膀啊。噢，伊是勒舒展舒展身體、活動活動筋骨呀！做姆媽真箇是邪氣勿容易個！一日到夜趴勒海肯定老勿適宜個，活動活動當然是必須個。
有一日天，我終於看到伊個先生了！體型看上去差勿多大，勿一樣個是氣派，看上去邪氣精神。伊左面看看，右面看看，大大咧咧個，像煞要當爸爸了，神抖抖個。對我個照料，人家只不過是稍微點點頭，大約摸是表示領情個伐。
鳥爸爸看上去老忙個，一歇歇也停勿下來，一來就拿頭伸到鳥媽個頭旁邊，好像勒勒餵食，一餵好馬上就飛走了。我還勒奇怪鳥爸為啥介快就飛脫個辰光，人家又回來了，搿能介樣子一日天總歸有得十幾個來回。
挨下來，伊就勒竹頭浪停下來了。鳥爸搭仔鳥媽一道，頭碰頭切切觸觸，象煞是勒勒低聲細語。伊拉兩家頭卿卿我我，嘰嘰咕咕了交關辰光，才看到鳥爸飛走了，鳥媽呢，老樣子，趴勒窼浪向。
鳥媽有辰光也會得離開一歇歇。鳥爸來了，剛剛立勒旁邊，只看到鳥媽從窼裡向跳出來，飛脫了。鳥爸來煞勿及個跳到窼裡向，像鳥媽一樣，趴勒窼裡孵小鳥。等到鳥媽回來了，伊再飛走。
昨日早浪向，我照樣勒勒七點鐘去陽光房，先去看看鳥媽，伊還是老樣子，趴勒窼裡向朝牢仔我看看。料理好花草之後，我回到書房裡繼續去寫作。
八點鐘左右，勒末生頭聽到女兒個聲音：「姆媽！鳥窼歪掉了，鳥嘸沒了！」急急忙忙上去看，嘸沒看到鳥媽，窼已經傾斜了，再仔仔細細查看，竹林個地浪向有隻蛋殼，邊浪向有隻業已成型、但聲息全無個小小鳥。
是鳥媽發現自家個寶貝已經死脫，憤怒，拿窼砸脫以後，傷心個離開了嗎？不得而知。
只是下半日勒陽光房品茶個辰光，看到鳥爸又飛來過兩趟。
我掬了一眼爛泥，蓋勒小小鳥個身浪向，搭伊做了一隻小小個冢。隨後，拿已經傾斜個鳥窼拆脫，期待有鳥能夠再次到阿拉屋裡個小竹林來，築窼，孵鳥，讓我有機會再當「月嫂」。