朗讀：曹凱
乘地鐵碰到小學同學，寒暄一番各奔東西。突然想起伊小辰光，因為勒男女同學當中儕混得開，綽號叫「萬能膠水」，伊同桌名字裡帶了一個「萍」字就叫「爛蘋果」，心裡一陣暗好笑。當年讀書咯辰光，幾隻搗蛋鬼熱衷於給每一個同學起綽號，我好幾年裡就一直被叫「大頭」。多年以後，有些人咯名字老早忘記忒了，但綽號還是念念不忘！
綽號，大多數是從名字諧音或外形特徵上演化出來的，也有出於行為舉止。譬如：「萬能膠水」出自於行為舉止；「爛蘋果」引申自名字；「大頭」則是外型；還有，把又瘦又長同學叫成"綠豆芽"，同樣長得又瘦又長，但腳有外趴就叫"蟹腳"，笡頭就是「六點零五分」。當年上海家長為小朋友起名字咯辰光，非但要叫得響亮，含義高雅，而且還要兼顧到不要被同學起不好聽咯綽號，特別是名字用上海閒話讀起來不可以有歧義。
上海人假使姓譚，起名字咯辰光一定要離「宇」字音遠一點，因為姓譚咯同學曾經給阿拉取綽號「痰盂」。還有，嚴姓的名字不能用「旺」，畢姓的不要碰「珊」，綽號叫「閻王」和「癟三」總歸不好聽。柴姓人家如有兩個兒子，千萬不可以取名「柴思、柴武」，原以為文武雙全，但用上海閒話講起來就會產生歧義。當然，聶姓和夏姓人家，囡兒起名字要注意「思萍」和「卓佩」。
文革期間，沒有師道尊嚴，阿拉班裡有一個年輕咯語文老師姓卞，普通話裡卞姓和大小便的「便」字同音，大家背後頭儕叫伊小卞。我咯同桌腦子缺根筋，上課回答問題咯辰光叫：「小卞、小卞」，卞老師沒有聽清爽，就走過來輕輕對伊講：「不要大聲叫小便太難聽」。啥人曉得伊馬上改口叫：「大卞！」
中學畢業大家儕長大成人了，再叫小辰光咯綽號有點不恭敬，所以大家改口叫名字。但是當面叫名字，背後就叫「魁兄」或者「某格裡」：姓王就叫「王格裡」，姓陸就叫「陸格裡」，「魁兄」和「格裡」這兩種稱呼是上海特有咯。
「魁」的意思北方人叫「顯擺」「充大尾巴狼」。
陸連奎當年是上海公共租界咯督察長，先拜黃金榮為「老頭子」，發跡後自認為是「上海灘老大」，得罪了「四大家族」，結果被暗殺。所以勒上海灘上還有一句俚語：「儂再魁也魁不過陸連奎！」，因為「魁」和「奎」讀音有點雷同，所以一直有人混用。「魁」可以組成好幾個詞組：「擺魁勁」「魁兄」「魁嗒嗒」。而上海人經常講的則是：某某人「老魁」。聽說蘇州人也有用「老魁」和「擺魁勁」來形容人咯。
「格裡」是老上海常用咯綽號，源自洋涇浜英文「同事」咯諧音，據說最早是稱呼洋行裡職員，後來，穿西裝擺架子咯男人也會被叫做「某格裡」，有點不屑一顧咯意思。
到了文革期間，一切儕顛倒了，大大小小，男男女女儕叫「師傅」或者「同志」。改革開放以後，覺得叫「師傅」太俗，叫「同志」太革命，還有可能被歧義為同性戀，所以大家就改叫「經理」或「總經理」，一時間連小超市咯負責人也要稱「總」，又過了一段辰光「老總」也泛濫成災，就乾脆叫「老闆」，一下子星火燎原，連大學教授所帶咯科研團隊儕稱呼教授為「老闆」。不過，勒阿拉這代人口中，叫「先生」「老師」最順口，叫「魁兄」「某格裡」最親切。
現在從年輕人嘴巴裡講出來咯上海閒話，比起以前要簡單多了，而且大有向普通話靠攏咯趨勢，伊拉不能體會用上海閒話取綽號時咯樂趣，不曉得「魁兄」「格裡」是啥意思，更不理解上海閒話裡咯噱頭是哪能擺進去咯！如果有一天上海閒話咯詞組儕要從普通話翻過來，而且還倷伊當作是正宗，搿就一點也沒有勁了！
「言話」基本解釋：說話，談話。南朝宋·劉義慶《世說新語·賞譽》「天錫見其風神清令，言話如流。」宋·蘇軾《歸去來集字》詩之三「言話審無倦，心懷良獨安。」此與今日上海話中「言話」的用法是一致的。
「閒話」基本解釋：指閒談；背後議論他人是非的話；不滿意的話，有關私人的謠言、傳聞、幕後消息等。見陸遊《雪意》詩：「閒話更端茶灶熟。」
圖：網絡 / 編輯：渺渺