白話廣州 ◎聞歌 媒體人
廣州人中意老火靚湯，如今生活改善咗，可以揀嘅食材多咗，不過有人反而唔敢揀，點解？
街坊何姨話，佢孫仔呢排唔多食嘢，於是佢翻開本食療湯譜，搵款靚湯煲俾個孫，點知越睇越煩：「陳腎湯」，擔心陳腎有亞硝酸鹽；「山楂水」，又驚住山楂幹有硫磺……何姨話，以前好多靚湯，家陣都唔敢再煲：豬膶、蛤乸、黃鱔之類，舊陣時最中意煲湯，如今好耐都冇食過啦。
咁嘅煩惱，估計唔只何姨一個。以前話「食得就系福」，家陣講「利口唔利福」，食品安全問題搞到大家冇啖好食，傳統嘅廣東靚湯會唔會慢慢失傳？希望只系杞人憂天。
形勢唔同咗，廣州人嘅飲食習慣「馬死落地行」，唔變都唔得。呢幾日有兩條新聞，都同食嘢有關。第一條系，如今禽流感咁勁，專家建議活禽集中屠宰，冰鮮上市，所以街坊要改下習慣，多食啲冰鮮雞鴨咁話。第二條新聞話，廣州抽查結果顯示，一半大米同米製品鎘超標，搞到好多街坊心驚驚。專家又話，大家以後不如多食啲雜糧，米麵錯開食，咁樣更安全健康。
專家嘅意見，唔系講笑。我哋買餸一直中意生猛，喜歡新鮮滾熱辣，凍雞凍肉如果唔搞特價，冇幾個人會買。不過，出於安全健康考慮，以後就要改下啦。另外，專家講嘅冇錯：番薯、麵條、豆類輪住食，唔好獨沽一味，至少分散風險嘛。
睇來，好多飲食習慣遲早都要戒先得。總之，把嘴以後就唔好咁奄尖啦！