首先！！！
我要講明一下呢篇攻略
全！部！系！美！食！
食食食
我就系用嘴食
你地就系眼睛食
哈哈哈
全篇無尿點啊馬上去片啦
第一日到達深圳已經系傍晚了
落左火車之後直奔皇庭廣場
皇庭廣場旁邊有一條長長嘅美食街
豐儉由人
各種飲料小食一應俱全
我地隨便食左幾塊壽司同小丸子當下午茶
果邊嘅冷飲店基本同廣州冇咩區別
飲左阿萊泰茶
個人最中意阿萊果love
上面系各種雜果粒
下面系椰漿加冰沙
除此之外
皇庭廣場入邊都有一d比較有名嘅連鎖店
例如外婆家 稻香之類
不過
我地黎皇庭廣場係為左呢個！！！
速度pizza
目前得深圳皇庭廣場一間店
具體地址
福華三路118號皇庭購物廣場G層39，50(近會展中心，皇庭廣場)
飯點會大排長龍
唔想排隊嘅小夥伴就錯開飯點或者早d去啦
大boss系烤雞拼盤！！！！
哇
鮮嫩多汁嘅烤雞
新鮮熱辣
薯條薯塊都新鮮鬆脆
仲有沙拉
食肉膩左可以食翻啖沙拉
食肉獸嘅真愛
呢個烤雞拼盤98蚊
都幾大盤
性價比都算高
除左基本每臺都有嘅烤雞拼盤
呢度嘅pizza都好正
超級薄嘅手工pizza
簡直好似食唔到餅底直接食肉咁
爽到飛！！
pizza大概60蚊左右
呢度嘅飲料平均都要30蚊一杯
我地冇飲
但系賣相唔錯
土豪們可以試試
有檸檬水免費提供
問服務員拿就得啦
第二日一大早起身去食潮汕腸粉啦
可能深圳潮汕人多
所以潮汕腸粉店特別多
所以帶路嘅小夥伴就帶我地黎呢間
「物個腸粉」
位於東門中心城一樓（沙樂山咖啡旁）
地鐵曬布站哦~
其實「物個腸粉」系一句潮汕話
意思就系「食個腸粉」
上圖系傳統普寧腸粉
呢度嘅腸粉都超大份
男仔點一份都可以食飽
其實潮汕腸粉嘅精髓在於湯汁
呢間腸粉入邊嘅料好豐富啊
蛋肉菜全部都有
粉薄青菜多
所以唔會滯
湯汁入邊有蝦米同魷魚
撈勻食超級起口
一啖接一啖
完全唔想停筷子
呢個叫「很牛肉腸粉」
其實就系普寧腸粉加左牛肉
味道都系一樣嘅
呢個叫蝦扯蛋腸粉
就系普寧腸粉旁邊放幾隻煮熟嘅蝦...
名好有賣點
但系內容不如想像中精彩
重點黎了！！！
食完摸下肚腩
愜意咁打個嗝
然後睇下張小票
嚇左一跳...
雖然真系幾好食
但系平均20蚊一碟腸粉
簡直貴到心碎
呢個腸粉系我出世以黎食過最最最貴嘅腸粉
宜家連腸粉都可以賣20蚊一碟了
咁工資點解仲唔升呢？
跟住從「物個腸粉」出黎
往東門步行街行
就會見到一間九龍城廣場
門口就有呢間
泰芒了
其實呢間廣州北京路都有啊
30蚊一杯
但系！！！
非常坑！！！
下面系加左糖精嘅芒果沙冰
（點解我知道距加糖精...因為飲糖精我智慧牙會痛/(ㄒoㄒ)/）
上面系超級超級多cream
芒果睇上去好大塊
其實好薄
而且d芒果系超級酸果種
我地三個人食一杯最後都冇食完
得出結論：就系買黎影相嘅...
跟住行入九龍城廣場
其實系一個比較老舊嘅廣場了
主要系買衫同精品
系一樓閒逛嘅時候
比一陣滷水嘅香味吸引左！
實在太香冇忍住
（明明啱啱食完好大碟腸粉噶）
買左薯仔 蛋 蓮藕 香菇 豆腐
都系幾蚊一串
都好入味
薯仔同蓮藕尤其好食
薯仔超級粉糯
蓮藕好爽口
你點好之後
老闆會幫你再拿去浸一下滷水汁
食唔到辣嘅同學記得點唔辣
因為呢度嘅微辣都系好辣噶
食過翻尋味
後黎又買左好多黎做宵夜
將距全部品種買左一次
毛豆好正啊
d豆豆超級粉帶住豆嘅清香味
支竹同油豆腐因為比較吸味所以比較鹹
肉類我覺得一般
唔系好入味
不過發現海帶好正
所以必點推薦就系薯仔 蓮藕 海帶
人均10蚊就可以食到超滿足啦
碰碰帶路tips
因為呢間我搜唔到具體地址
所以就放個招牌比大家睇
叫「滷至深」
記住！！
九龍城一樓！一樓！一樓！
其實好好穩噶，就系樓梯旁邊
你會聞到好香滷水味
東門步行街實在太大
行到好攰呀
就去電影院睇左「大魚海棠」
東門附近好多電影院噶
價錢同廣州差唔多
逛攰左去電影院睇個電影坐下都系唔錯嘅選擇
唔知你地對呢部戲嘅評價如何呢？
講實話
去豆瓣睇d人點評仲精彩過電影本身啊哈哈哈哈哈
睇完電影就餓啦
然後就去九方廣場
（地鐵華強路或者華強北哦~）
九方真系超級大啊
地形複雜...
行到我地wingwing地
睇左好耐都唔知食咩好
本身已經放棄尋找
淋住食九毛九算了
點知比我發現左呢間！
叫「巴依的小羊」嘅新疆菜
地址華富路1018號中航華強北九方購物中心北區L441-442
架子肉（36蚊兩塊）
我食出黎嘅味道系敦煌沙洲夜市炕羊排嘅味道
算比較正宗
同我系敦煌食嘅味道相差唔大
如果此時有一瓶薑啤就正啦~
(¯﹃¯)
呢個羊肉手抓飯
羊肉好細
飯都唔系好大份
呢度嘅菜都非常「精緻」
不過呢個飯幾好味
羊肉湯住嘅飯
飯吸收曬羊肉湯嘅精華
簡直可以比五星好評！！！
烤羊肉串基本系必點
因為好中意燒烤
所以一般見到有都會點
呢個羊肉串麻麻地
因為我覺得太隆了
呢度嘅肉夾饃味道唔錯
夠多肉夠多汁
不過入邊嘅肉系一粒粒咁噶
都唔系切碎噶
正宗嘅肉夾饃入邊應該夾切碎嘅滷肉
涼皮就中規中矩啦
呢餐飯食左180蚊
三個人食
雖然菜嘅分量比較少
但個人覺得味道比較正宗
對得住人均60蚊
最後買左臺灣啤酒翻去餸滷味
假裝自己系臺灣哈哈哈~
個人幾中意臺灣啤酒
覺得麥芽嘅清香比較濃
飲d酒可以幫助睡眠哈哈哈
（小朋友唔好學呀！）
最後一日去試另一間潮汕腸粉
帶路嘅小夥伴話潮汕腸粉每間店都有自己獨特嘅做法
所以每間店嘅味道唔一樣噶
威記腸粉店
羅湖區華麗路2038-5翠花花園底商嘉華中西快餐點隔壁(近愛國路)
碰碰帶路tips
好多深圳嘅朋友都同我推薦過呢間店
但!系！
注意了
一定要認住呢個地址
帶路嘅小夥伴話
威記好多分店
但系只有呢個地址呢間店先系最好食
果然
呢間店嘅做法同琴日嘅差別好大
呢度嘅腸粉入邊系冇包青菜噶
全部都系肉肉肉哈哈哈
我叫嘅系雙蛋瘦肉
呢度嘅腸粉好滑
食落去好似果凍咁一下就滑過你喉嚨
鮮味再系口腔擴散
感覺好美妙
腸粉價錢都系5-12蚊左右
有四條
人均10蚊就可以食飽啦
對比味道
其實今日呢間同琴日果間味道都好好
口感味道各有千秋
不過論性價比就呢間高d
由於琴日食左一個好難食嘅芒果杯
小夥伴又對芒果杯非常執著
所以我地就去左另一家芒果杯
呢間叫「找茶友」
具體地址東門街道湖貝新村101號102之1
系湖北新村嘅大牌坊或者牌坊落
然後步行5分鐘左右就到啦
（穩唔到就問下人，其實好好穩，因為好多人排隊噶）
哎？
唔好意思
上面呢個系雙果撈唔系芒果杯
滿滿一大杯都系料...
每一啖超正超滿足
入邊有西瓜芒果奇異果爆珠珍珠椰果
15蚊真系食到飽曬
雖然店面真系好細
但系好多人排隊
啊~~
呢個先系大boss！！！
講真
呢個系我食過最好食嘅芒果杯啦！！
下面嘅芒果冰沙冇乜糖精
食完智慧牙唔會痛哈哈哈
然後呢度嘅cream應該系用動物奶油
而且分量少
唔會好似親日果杯咁膩
上面嘅芒果都系好大塊噶
而且系純甜味果仲
一塊就可以塞滿個口
幸福感爆燈！！！
25蚊一大杯
比琴日果杯實在好太多了~~
然後再次回到九方廣場
為左呢個榴槤班戟
因為呢間系新開嘅
所以地圖上面冇詳細地址
從地鐵華強路B出口往中航路行
呢間店就系左手邊嘅世紀匯街鋪
專門食榴槤嘅一間店...
然而我唔知道距叫咩名（捂臉）
但我知道呢間店嘅榴槤班戟入邊榴槤多過cream
簡直就好似食榴槤咁口水
但系因為有cream
所以更加香滑
榴槤班戟36蚊3塊
我覺得其實小貴啦
因為大概系3*3*2cm咁嘅體積
比較細塊
食過下午茶又系時候食完飯了
因為好想食檸檬魚
所以小夥伴帶我地去左「柒號餐廳」
地址廣東省深圳市羅湖區人民南路2049-1
呢個清炒土豆絲一定要點！！！
炒得唔錯！！！！！
重點系！！！
五蚊一大碟啊哈哈哈
跟住呢碟好Q樣衰嘅就系菠蘿雞柳
我開始以為距回炸過d雞柳先炒
想像中應該系類似咕嚕肉咁嘅
不過等距一上臺....
我地三個就變左三臉懵逼了=0=
味道真系麻麻
雞柳就系雞味
菠蘿就系菠蘿味
建議唔好點
重頭戲檸檬魚！！！
呢個好大盤嘅檸檬魚先48蚊！
超級多魚肉
而且d魚肉好大塊基本冇骨
最正系個湯
鮮甜得黎又酸酸甜甜
超級開胃
呢個系薯條炸裡脊
開始以為系薯條同裡脊炒埋一齊
其實d薯條就系比你點果d汁
距嘅薯條系番薯唔系薯仔哦
食起身好香甜
炸得夠曬酥
炸裡脊我覺得外面嘅粉稍微多左d
不過小夥伴話炸裡脊其實系食出邊果層
有冇人可以話比距有冇講大話呀？
呢餐食左130蚊
除左菠蘿雞柳外味道都非常好
食得超級飽
性價比超高
推薦~
食完呢個美味嘅dinner~
深圳美食之旅就結束啦嘿嘿！
加上深圳市內用嘅交通費
三日落黎人均500蚊有找
深圳消費系比廣州貴
但系相比之下深圳好食嘅野多d
其實都系一分錢一分貨噶
你只要捨得
就有好野食
深圳黎廣州咁近
去深圳覓食都系一個唔錯嘅選擇哦~
你有什麼想去的地方？
你想知道哪裡的攻略？
小編哪裡還做得不夠好？
歡迎在公眾平臺留言
或者私信我哦~
私人微信：KuangRenLY
麼麼噠(づ￣ 3￣)