1. 派頭：Pride（自豪、威風）
70年代，流行講「派頭」這個形容詞，即係「講派場、有威勢、夠鋪張」嘅正面稱讚。「派頭」來自英文「Pride」。
例句：「佢哋結婚，飛去法國古堡舉行婚禮，仲包埋所有親友機票食宿，真係夠哂派頭！」
2. 痾畢甩：痾blood（痾血）
如果遇上麻煩、辣手難題、或者死路一條，就會自嘆一句：「呢一鑊真係痾畢甩！」「畢甩」來自英文「blood」，在腸癌橫行嘅今天，「痾血」都咪話唔大鑊！
例句：「嚇？你架Civic仔撞爛人哋架法拉利？你今次真係痾畢甩！」
3. 蛇quare：Scare（驚嚇、恐懼）
「蛇quare」形容人「騰雞，無膽，大驚少怪」，「蛇quare」來自英文「Scare」
例句：「你唔好咁蛇quare啦！乜都自己嚇自己一餐！」
4. 僕街：Poor guy（粗劣嘅人）
「僕街」經常被人誤以為係「動詞」：咀咒對方「僕喺條街度！」其實「僕街」係名詞，來自英文嘅「Poor guy」。「Poor」不係「貧窮」嘅意思，而係「粗劣、低俗、破爛」嘅意思。
例句：「呢條友連80歲啊婆衝涼都裝！正一僕街！」
5. 花臣：Fashion（新款式）
80年代，一講到「花臣」，就係指新嘅gimmick（噱頭）。即係「新招數、新花款、新點子」，「花臣」來自英文「Fashion」
例句：「哼！黔驢技窮！睇你仲有乜嘢新花臣吖？！」
6. 蝦碌：Hard Luck（惡運倒黴）
蝦碌泛指拍電影時嘅NG片段，所謂「蝦碌鏡頭」，現實生活裡，蝦碌指忙中有錯，掛萬漏一，失之交臂。「蝦碌」來自英文「Hard Luck」，行衰運所以蝦碌！
例句：「唔好意思，一時蝦碌，將你個文件delete咗！你要重新再打過呀！」
7. 老粒：Rob（搶劫）
90年代初，流行講「老粒」，即係搶劫。「老粒」並非指一粒很老嘅東西，「老粒」來自英文「Rob」
例句：「咪鬱！老粒呀！快啲攞哂啲錢出嚟，唔係一刀捅瓜你！」
8. 符碌：Fluke（棒球術語：僥倖擊中）
「符碌」指不靠實際能力，幸運地達成目標、純粹僥倖彩數。「符碌」來自英文「Fluke」，係但馬虎，隨便求其，但又能幸運地完成艱鉅任務。
例句：「臨尾一Q，俾佢符符碌碌咁打埋個黑柴入尾袋添！」
9. 唱錢：Change（貨幣找換）
當要使用另一個國家嘅貨幣，便要去找換店「唱錢」，「唱啲美金」、「唱啲英磅」、「唱啲人民幣」，「唱錢」來自英文「Change」（日語叫兩替店）
例句：「下個禮拜去倫敦旅行，而家趁英磅平，唱定啲錢先！」