於娛樂圈打滾多年的藝人莊思敏，先後投資過不同生意，次次都有聲有色，繼餐廳、自家品牌護膚品及運動服後，最近搞埋酒吧，據悉，佢豪擲七位數於銅鑼灣耀華街開樓上酒吧，百足咁多爪！不過，面對呢塊黃金地，各色各樣嘅酒吧林立，乜嘢玩法都有，真系競爭好大㗎！莊思敏把心一橫，喺酒吧入面增設時興嘅拋桌球波機同多功能遊戲檯，睇嚟有新意喎！
壞機吹水搞氣氛
酒吧於日前試業，莊思敏拉埋阿妹莊思明落場冧客，兩姊妹吸客力強！甫出現即引來客人歡呼，蜂擁上前集郵，佢哋當然畀足面照單全收，咁啱有一部遊戲機「跪低咗」，職員搶修期間，為免令客人失望，莊思敏即上前化身人肉吹水機，同客人喪吹，搞到笑聲滿酒吧。
莊思明隔空傳情
莊思敏趁勢轉陣，行過去另一部多功能遊戲檯前搞氣氛，職員向老闆娘細心解釋點玩，見莊思敏愈玩愈興奮，其他客人亦唔執輸走過嚟觀戰，
惟跟得妹妹思明玩完一輪過後把焦點落在手機上，喪打字偷偷笑，九成同男友楊明隔空傳情啦，但系莊思敏就繼續開行Turbo搞氣氛。
做老闆真系唔容易，見莊思敏滿場飛，不知不覺又走咗入調酒區睇場，仲用手機拍下擺設，跟住同類似主管嘅職員密密斟，搞咗一輪，又拉住調酒師傾酒單，開間吧都咁認真，唔通想做埋夜生活女王。
再戰江湖一條龍
之後，東網就此事聯絡莊思敏，她承認有份投資：「其實都系情意結嚟嘅，因為十幾年前我喺同一地方投資過酒吧，今次算系卷土從來囉！都系同班朋友夾份啫！未正式開業嘅，試業階段中。（投資咁多範疇，你頂得住？）樣樣都有啲唔好咩！都想一條龍服務㗎！（咁忙邊有時間拍拖？）又真系幾忙，不過拖梗系想拍，依家冇咪搵嚇錢先，相信上天自會有安排。」