「想就做，無嘢阻到你。」
【結婚打大佬：外母】
據政府統計處於2018年1月15日出版的《1991年至2016年香港的結婚及離婚趨勢》顯示，男性和女性首次結婚的年齡中位數於2016年已上升至31.4歲和29.4歲。2018年，遲婚現象定會更趨普遍，年齡中位數定會有增無減。
作為一個過多幾年便達「首次結婚年齡中位數」的男性，對於結婚，當然首先你要有個女朋友，然後就算女朋友不介意你收入低、無父幹、未有車又未有樓，但伯母呢？看過盧宛茵的《公屋●居屋●私樓》、看過《逆緣》的上海婆徐家媛（馬海倫飾）與賀永年（黎耀祥飾），坦白說，有壓力。偏偏，賴慰玲與男友未置業，甚至未結婚，但先生B。
「（借問聲當初你丈夫點過到未來嶽母嗰關？聽聞最後婚禮、酒席都好似……）完全無問題，因為我家族好大，一拜年可有五、六十人，每個都係廿幾歲結婚生仔，我已經去到30歲，所以對佢哋係：『仲未結婚生仔？』當我話有咗喇，佢哋會話：『哎，咁就好喇。』
「同埋擺酒係為咗長輩，咁我真係唔想喎，又唔想太攰，加上我好唔鐘意擺酒時有9成人我都無同佢哋傾過偈，所以寧願人少少只係屋企人食餐飯，跟住對其他朋友就話：『我結咗婚喇，不如出嚟食個飯啦。』或者依家生咗小朋友就：『喂，不如一齊嚟睇下BB啦。』我會鍾意係咁囉。」賴慰玲說。
結婚最梗要新人開心，其他諗咁多做乜？（IG相）
【擺酒為邊個？】
話雖如此，但作為男士怎也擔心連酒席也不擺，外家會有「意見」，因此就算明知擺酒只是往長輩面上貼金，也情願花費這一筆錢（說到底或者只是男性自尊心作祟）。
賴慰玲說：「都係架，所以佢（老公）會不斷問我你有啲咩想做、想要，例如使唔使上頭？咁我就問我阿媽，佢話上咁我咪上囉；使唔使過大禮？阿媽話過咁咪過囉。有要求就出聲，有咩想做就做，咁就得架喇！反而唔好諗有咩唔想做，咁樣成件事會搞到唔開心。」就似佛偈，嗒落有智慧。
至於置業問題。「買樓？日日都咁諗架啦！我都係個蟻民，想買樓又買唔起，一直都係租樓交緊租，所以有陣時咪就係睇你幾想做嗰件事囉。如果你真係想結婚生仔，其他嘢唔會阻到你，當呢啲嘢阻到你嘅時候就係籍口。如果阻唔到時，咁就係你真正想做嘅嘢。」聽完賴慰玲這樣說，巴絲們有勇氣了嗎？膊頭輕了嗎？想成家了嗎？