等咗咁多年，家燕姐終於有新抱茶飲，當然笑到見牙唔見眼啦。
網上經常流傳著上裙褂嘅新娘子，身上戴滿金器同龍鳳鈪，代表住長輩對新人嘅祝福。
6月11號係薛家燕囝囝石耀庭同女友Zoe拉埋天窗嘅大日子，由阿仔求婚成功開始，家燕姐對娶新抱一事就非常著緊，之前已經送上市值2千萬嘅西半山豪宅俾阿仔作新居。呢日阿仔接埋老婆，斟新抱茶俾奶奶飲，家燕姐亦準備超大厚禮 --- 六層金豬鍊加特大立體龍鳳鈪，單計金器價值已經超過40萬。
Jackson用大紅花橋迎娶新娘子。
家燕姐二仔石耀庭（Jackson）呢日迎娶女友陳素怡（Zoe），新郎哥跟足傳統著上金黃色馬褂，胸前掛上紅繡球，Book埋大紅花橋去接新娘。接完新娘後就當然要向奶奶斟茶啦，家燕姐等足咁多年終於飲到杯新抱茶，真係甜到入心。由囝囝拍拖起，家燕姐已經當正Zoe係親生女一樣，今日正式成為一家人，當然特別興奮。
家燕姐同親家奶奶（圖右二）及Zoe婆婆（圖左二），都有著上媽媽裙褂，相當喜慶。
金器一貫係婚禮上新娘子必備飾物，由頭到頸仲有雙手，戴得愈多愈有排場，家燕姐亦唔例外，呢日準備咗六層金豬牌親手為新抱戴上，3隻大金豬連同一層細金豬叫做「四代同堂」，家燕姐買足6層，肯定好恨兒孫滿堂啦。
６層金豬牌真係相當罕見﹗
除咗豬牌以外，其中一對立體龍鳳鈪更加係份量十足，龍鳳雕功精緻活靈活現，目測應該重量超過10兩，單係呢對鈪已經估計超過15萬，全部金器加埋超過40萬﹗之前過大禮已經花費過百萬，加上兩場婚宴，呢次家燕姐豪使4000萬娶新抱，真係錫到佢地燶呀﹗
家燕姐準備超過４０萬金器，送俾一對新人。
有網友笑言，立體龍鳳鈪似足拳套咁大。
即click圖輯睇婚宴有幾豪