灶披間 | 清炒紅菜苔、蔥油花蛤和泡飯

搿兩天，特別歡喜眼門前，迭個兩隻小菜，清清爽爽裝勒兩隻藍印花小碟子裡：一碟清炒紅菜苔，用葷油炒，只擺點鹽，十分鐘左右就弄得好的一隻菜，從品相到吃口，倒儕勿簡單：新鮮辰光紅裡帶綠，勒油鑊子裡燒熟後，又綠裡帶紅，盛出來吃上去，肥篤篤、糯篤篤，素小菜吃出肉味道。

另外一碟蔥油花蛤，早上買好養勒水裡，泥沙出出清爽；就擺蔥姜兩樣一道炒炒，合好料，幾分鐘就可以炒好的一隻小菜，味道鮮是鮮得來。

特別是，日裡出去做事體，夜裡回屋裡，又勿高興多弄飯菜辰光，就迭能炒兩隻小菜，配一碗清清爽爽白泡飯。

吃好仔，再泡一壺香香甜甜的昔歸，想想明朝要做一眼事體……愜意得叫人想起，老同學最近發來的一個新年祝福：所謂好日腳，就是有人愛、有事體做、有茶吃和有所期待。

想想也是，一個無所事事的人，是要生事體的。

講起來，花蛤也好，紅菜苔也好，儕是迭兩年新行出來的小菜。

從前上海人歡喜吃蛤蜊，扇形，圓骨隆冬的，常常是用伊燉蛋，也是可以上檯面的一隻菜；而迭種長夭夭裡的花蛤，是後來再有的；清炒綠菜莧倒是春天裡的常見，因為太家常，所以，不大上得臺面。

而眼門前的紅菜苔，來頭勿小。是阿拉中國原產的，勒唐朝辰光就已經出名了，不過，從前辰光，多用來進貢撥皇帝吃的，所以，也稱伊作：金殿玉菜。紅菜苔長得也蠻討人歡喜的，紫紅色的菜梗、綠葉子比較短小，開金黃顏色小花。

現在辰光，就是價鈿稍許貴一點。

不過，汏汏清爽，倒也嘸啥要摜脫的末事。性價比，還比較高的。