作者 ▏ 江暉
@點擊音頻聆聽粵語故事
粵語講顏色嗰陣都有獨特嘅講法，例如講紅色就有「紅當蕩」，形容人面色好就有「紅粉花緋」。黃色就「黃禽禽」，指黃得暗淡難睇。如果形容啲嘢唔新鮮或者唔好睇，就叫「黃黃瘀瘀」。
綠，綠油油。如果形容一個冇乜醫術嘅醫生，我哋就叫佢做「黃綠醫生」。青，青嗶嗶。青色好多時用嚟形容面色，「面青青」就系面泛青色，如果個人平時面青青，冇乜血色，肯定身體就麻麻地喇。如果塊面突然間由紅轉青，噉一般都會帶有暈或者痛嘅症狀。青再加上白，「面青口唇白」，個身體狀況就更加唔好囖。「青面獠牙」形容個人長相兇神惡煞，面目猙獰。如果一個人遇事覺得驚，或者平時做人小心翼翼，我哋都可以話佢「驚驚青青」。可見，個青字形容面色或者人，都唔多系咩好嘢。
白，白蒙蒙、白lai4 lai4、白lai4 sai4、白sai4 sai4。白雪雪加個滑捋捋，就系形容人皮膚好。白字一般用嚟形容清淡、清白。例如味道淡到冇味嘅白滾水；烹飪方式嘅白灼、白熠，就系最簡單嘅用滾水淥。我哋廣州人最愛嘅白切雞，都系用最簡單嘅「白」字式烹飪，將成只雞蒸或者煮熟後，切開一嚿嚿，再擺翻個型，上檯。
黑呢，黑孖孖、黑掹掹、黑眯掹，形容人滿臉不高興個樣就叫「黑口黑面」。運氣差嘅人叫「黑仔」，或者「黑過墨斗」，例如：呢勻真系黑過墨斗囖，做乜都唔掂，行路打倒褪。
粵語有個詞叫「三分顏色當大紅」，指得到少少稱讚就以為好巴閉，得意忘形。點解系大紅色呢？因為中國人都覺得紅色喜慶又威水，所有同吉利有關個春聯、燈籠、爆仗、利是封，邊樣唔系大紅色？就連鬼佬都知道有種紅色叫中國紅。
圖片來源網絡 版權歸原作者
講好老廣故事，支持粵事原創