翻查當年的得獎歌手，分別是羅力威、連詩雅（Shiga）、龍小菌、蔚雨芯及吳彤，網友見狀即叫得獎者拿獎自拍證清白，誰做不到就是「兇手」。
一眾「嫌疑人」隨即留言澄清。
來到這種尋真兇的情況下，一眾香港網民就紛紛金田一上身分析各種線索，其中就有人指獎項棄置地點位於北角，最初大家都以為羅力威所以居於北角，所以嫌疑最大，不過其太太雨僑指二人其實住喺九龍，可能性較低；另外有人指蔚雨芯話奬項一直放喺公司但就冇合照，最大嫌疑似乎係佢。但最有趣的就莫過於有網民在照片傳出後趕到現場去希望能拾得該獎項，不過到達時獎項經已消失。
龍小菌受訪時笑言，第一時間想過獎座會否被家人丟掉：「我好珍惜啲獎，因為唔容易攞。（想知邊個丟？）邊個丟對我嚟講冇所謂，因為獎嘅實體冇必要，如果你攞獎，喺大家心目中已經證明咗你值得攞呢個獎。」而Shiga剛放完假由外地返港，透過經理人公司同事，幫她在公司獎櫃影相證清白，並表示：「我星期日會返公司，到時先可以同我啲獎影相，由我出道攞過嘅所有獎都放喺公司，因為公司有個櫃係專放我哋啲獎，齊曬㗎！」
至於吳彤亦有相為證，曾報稱住北角的他嫌疑最大，但原來他已移民加拿大，並指獎座仍存放在香港的儲物倉，應該好安全，而且提供了一張相片，是他離港前將物品放入倉時拍攝，他又懷疑被棄置的獎座是否多出來的Sample。之後又在網上澄清：「我獎唔多，所以擺倉都仲有好多地方，有緣攞出嚟影張相囉。」
以上三人都有相為證，但蔚雨芯及羅力威就未有拿出有力證據。蔚雨芯強調獎項由公司保管：「最近公司搬Office，所以啲獎項Pack曬入迷你倉，遲啲等公司同事拎番出嚟，等我影番張相畀啲朋友仔睇。」她覺得事情搞笑又震驚：「雖然呢個獎好多歌手曾經擁有過，但未至於要咁樣丟咗去，除非真係唔小心。」
龍小菌貼相澄清
至於羅力威就耍手擰頭話：「真係唔係我！」但之後又笑說：「我有一刻懷疑可能真係我，但諗諗嚇覺得冇咩可能，因為我又冇喺嗰頭出現，雖然尋日我有去北角，哈哈！」網民即指他答得模稜兩可，相當有可疑，更叫他攞獎座出來。
五位歌手已經自辯，究竟誰是真正「兇手」？
新城前臺長朱明銳認為獎項是神聖崇高的，歌手應該珍惜背後的意義：「可能有歌手已經退出樂壇，等如有些學生只保留大學證書，而不要小學中學證書一樣！尊重與否各自修行！又或者真的家居太小啦！沒有收藏位置，但怎樣也好，理應妥為處理！因為是歌手的曾經光輝奮鬥印記！」
新城頒獎禮真係別樹一格，當中創造出唔少頒獎禮之最！
1) 「最」多獎
新城頒獎典禮一直都被人感覺係「分豬肉獎」，事關頒獎禮以多獎見稱，真係人人有份、有到有獎、皆大歡喜！獎項數目一直大起大落，由2000年的53個，上升到2005年的125個，高峰期要數到2012年嘅163個獎！其實新城都叫做照顧歌手同粉絲，唔洗大家「坐足幾個鐘」直到2016年開始改革，去年更只頒發61個獎。
單睇新城勁爆歌曲呢個獎中，2005年高達21首，係近呢幾年先至回落翻10首。
2) 「最」照顧國語歌
有別於另外三大頒獎典禮（港臺、TVB、商臺），新城勁爆頒獎禮自2002年另外分有另一場「新城國語力頒獎典禮」，至2015年停辦。頒獎禮上嘅座上客近8成都係華語歌手，都有一部份有出國語歌嘅香港歌手有份出席「分獎」。
2014年嘅頒獎典禮臺灣男子組合Lollipop F 與一眾英皇歌手都有份出席！
3) 「最」多歌手出席
因為新城頒獎禮唔係好設門檻，只要唱片公司報名，歌手就好大機會得獎，所以新城頒獎典禮真係好似一個音樂界嘅嘉年華會，唔少3、4線歌手都會出席。新城又唔會似TVB音樂頒獎典禮咁只有某幾間唱片公司嘅歌手出現，咗人多都有樣好嘅，歌手可以趁機聚會，大家又可以見證到香港其實仲有好多未走上大舞臺嘅歌手、音樂人。
4) 「最」識細分獎項
新城頒獎典禮一貫喺男、女歌手、新人、組合獎都比較「特別」，無講明金銀銅！
2018年3位勁爆男歌手：
用2018年嘅得獎名單做例子：
· 勁爆年度歌手：張敬軒
· 勁爆男歌手：陳柏宇、許廷鏗、周柏豪
· 勁爆女歌手：鄭欣宜、謝安琪、Gin Lee
· 勁爆演繹歌手：謝安琪
· 勁爆組合：Dear Jane、Tonick、Supper Moment
又唔會同其他頒獎禮咁單單得一個歌手獎，又或者只係分金、銀、銅3個獎！